काठमाडौं । नेपाल प्रिमियर लिग(एनपीएल) को फाइनल खेलमा सट्टेबाजी गर्ने दुई भारतीय नागरिक पक्राउ परेका छन् । शनिबार भएको जनकपुर बोल्ट्स र सुदूरपश्चिम रोयल्सको खेलमा सट्टेबाजी गराएको आरोपमा जिल्ला प्रहरी परिसर काठमाडौंले दुई भारतीयलाई पक्राउ गरेको हो ।
पक्राउ पर्नेमा भारतको उत्तरप्रदेश आग्रा सिकान्द्रा पञ्चायत घर भई हाल काठमाडौंको टोखा नगरपालिका ३ ग्राण्डी टावरको नेप्चुन बिल्डिङमा बस्ने ४७ वर्षका हरिस जावा र सोही ठाउँका ऋषि मातन रहेको परिसरले जनाएको छ ।
उनीहरुको साथबाट प्रहरीले सट्टेबाजी गराउन प्रयोग भएका मोवाइल, ल्यापटप बरामद गरेको छ । यसअघि पनि एनपीएलमा बेटिङ गराएको आरोपमा प्रहरीले केही भारतीय नागरिकलाई पक्राउ गरेको थियो।
