काठमाडौं । सर्वोच्च अदालतले राष्ट्रिय स्वतन्त्र पार्टीका नेताहरुले अदालतको अवहेलना गरेको रिटमा लिखित जवाफ माग गरेको छ ।
मंगलबार सर्वोच्चका न्यायाधीश विनोद शर्मा र महेश शर्मा पौडेलको इजलासले लिखित जवाफ माग गर्ने आदेश दिएको हो ।
यसअघि मंसिर ११ गते न्यायाधीशहरू मनोजकुमार शर्मा र नृपध्वज निरौलाको इजलासले थप विवरण माग गर्ने आदेश दिएको थियो ।
अधिवक्ता अनुपम भट्टराईले रास्वपाका नेताहरूले अदालतको अवहेलना हुने गरी प्रदर्शन गरेको भन्दै कात्तिक कात्तिक २९ गते रिट दायर गरेका थिए ।
रिटमा सार्वभौम संसदको सांसद पद धारण गरेको विपक्षीहरूले अदालत प्रतिको जनआस्थालाई भत्काउने गरी सञ्चालन गर्दै आएको कार्यले विपक्षीहरूलाई थप सजाय हुनुपर्ने माग गरिएको छ । उनले सांसदहरू डा. स्वर्णिम वाग्ले, सुमना श्रेष्ठलगायत २० जनालाई विपक्षी बनाएर रिट दर्ता गराएका हुन् ।
सहकारी ठगी र संगठित अपराध कसुरमा गत कात्तिक २ गते रास्वपा सभापति रवि लामिछाने पक्राउ परेका थिए। त्यसबेलादेखि नै रास्वपाले राजनीतिक प्रतिशोधका आधारमा सभापति लामिछानेलाई पक्राउ गरेको भन्दै सडक प्रदर्शन गर्दै आएको छ ।
अब विपक्षी बनाइएका रास्वपाका केन्द्रीय पदाधिकारी एवं सांसदहरूले सर्वोच्च अदालतमा लिखित जवाफ दिनुपर्नेछ । त्यसपछि अवहेलनाको निवेदनमाथि सुनुवाइ प्रक्रिया अघि बढ्नेछ ।
