काठमाडौं । नेपाल समाजवादी पार्टीका अध्यक्ष एवं पूर्वप्रधानमन्त्री डा. बाबुराम भट्टराईले नयाँ विकल्प नपाएर जनता पुरानै दललाई छान्न बाध्य भएका टिप्पणी गरेका छन् ।
स्थानीय तहको उपनिर्वाचनको परिणामलाई लिएर सामामाजिक संजालमार्फत भट्टराईले यस्तो टिप्पणी गरेका हुन् । उनले ४१ तहको उपनिर्वाचनमा अधिकांश ठाउँमा पहिलेका दलनै एकअर्काको विकल्प बनेका भन्दै जनताले नयाँ छान्न विकल्प नपाएको बताएका छन् ।
उनले भनेका छन्, ‘दुई वर्षभित्रै भएको ४१ वटा स्थानीय तहको उपनिर्वाचनमा अधिकांश ठाउँमा पहिले जितेको दलले हारेको र अर्को दलले जितेको देखिएको छ। साथै केही ठाउँलाई छाडेर अधिकांश ठाउँमा तीन पुराना दलनै एक अर्कोको विकल्प बनेका छन् । यसको सोझो अर्थ हो जनता असन्तुष्ट छन्, विकल्प चाहन्छन्, तर नयाँ विकल्प नपाएर पुरानैमध्येबाट एउटालाई छान्न बाध्य छन्।’
उनले अब नयाँ र वैकल्पिक शक्तिले यसबाट पाठ सिकेर आफ्ना कमजोरी सच्याउनुपर्ने उल्लेख गरेका छन् । उनले भनेका छन्, ‘नयाँ र वैकल्पिक शक्तिहरूले यसबाट पाठ सिकेर, आआफ्ना कमजोरीहरू सच्याएर अर्को पटक जनतालई विश्वासिलो र भरपर्दो विकल्प दिन सक्नुपर्छ। अन्यथा जनता अर्कै विकल्प खोज्न बाध्य हुनेछन्।’
