बीबीसी । जर्मनीको पूर्वी भागमा अवस्थित माग्डबर्ग सहरको एक क्रिसमस बजारमा तीव्र गतिमा रहेको एउटा कार मानिसहरूको भीडमा जोतिँदा एक शिशुसहित कम्तीमा दुईजनाको मृत्यु भएको छ ।
अधिकारीहरूका अनुसार ६८ जना मानिसहरू घाइते छन् जसमध्ये कम्तीमा १५ जना गम्भीर अवस्थामा छन् । सन्दिग्ध हमलाकारी एक ५० वर्षीय साउदी चिकित्सक रहेको साक्सनी क्षेत्रका प्रमुख राइनर हाजलफले जनाएका छन् । ती व्यक्ति पक्राउ हुँदाको क्षण भिडियो फुटेजमा देखिन्छ ।
एकजना प्रत्यक्षदर्शीले उक्त हमला भएपछिको अवस्थालाई ‘भद्रगोलपूर्ण’ बताएका छन् । सन् २००६ यता जर्मनीमा बसिरहेका ती सन्दिग्ध व्यक्तिसँग त्यहाँको स्थायी आवास अनुमति रहेको प्रहरीले जनाएको छ । स्थानीय अधिकारीहरूले त्यो नियतवश गराइएको हमला हुनसक्ने आशङ्का गरेका छन्।
