काठमाडौं । कीर्तिपुर नगरपालिकाका ननिर्वाचित मेयर कृष्णमान डंगोलले पद तथा गोपनीयताको शपथ ग्रहण गरेका छन् । मंगलबार कीर्तिपुर नगरपालिकाको सभाहलमा मेयर डंगोलले पद तथा गोपनीयताको शपथ ग्रहण गरेका हुन् ।
शपथ ग्रहण पछि उनले आफूले निर्वाचन अघि मत माग्दै गर्दा जनतासामु गरेका प्रतिवद्धताहरु पूरा गर्ने विश्वास दिलाए । उनले आफ्नो पहिलो निर्णय स्वास्थ्यबाट काम सुरु गर्ने जानकारी दिए ।
उनले भने,‘मैले तपाईंहरु सामु भोट माग्दा गरेका प्रतिवद्धताहरु यो दुई वर्षको कार्यकालमा एकछिन पनि आराम नगरीकन, नथाकिकन सकेसम्म पूरा गर्ने विश्वास दिलाउन चाहन्छु । तपाईंहरुको विश्वास टुट्न दिने छैन । पहिले आफ्नो पहिलो निर्णय स्वास्थ्यबाट गर्ने छु ।’
मेयर डंगोल पाँच हजार ३३४ मत प्राप्त गरी विजयी भएका हुन् । उनका निकटतम प्रतिस्पर्धी नेकपा (माओवादी केन्द्र)का शिवशरण महर्जनले चार हजार ५५५ मत प्राप्त गरे । त्यस्तै, एमालेका सुरेन्द्र मानन्धरले चार हजार ३२७ र स्वतन्त्र उम्मेदवार राजमान महर्जन ‘मानव’ले दुई हजार ३६ मत पाएका थिए ।
