काठमाडौं । जिल्ला प्रहरी कार्यालय कञ्चनपुरमा कार्यरत एकजना प्रहरी जवानले आफैंलाई गोली प्रहार गरेका छन् । शुक्रबार साँझ प्रहरी जवान चक्रप्रसाद न्यौपानेले आफैंले आफैंमाथि गोली प्रहार गरेका हुन् । कार्यालयको हतियार राख्ने कोठाभित्र उनले आफूमाथि गोली चलाएका थिए ।
प्रहरीका अनुसार, गोली उनको निधारमा लागेको छ। घाइते न्यौपानेलाई तत्काल महाकाली अस्पताल पुर्याइएको थियो। तर, त्यहाँ उपचार सम्भव नभएपछि उनलाई थप उपचारका लागि अहिले धनगढी रेफर गरिएको छ ।
जिल्ला प्रहरी कार्यालय कञ्चनपुरका डीएसपी उमेश जोशीका अनुसार, न्यौपाने फायरिङ तालिममा संलग्न थिए । हातहतियार मिलाउने र रेकर्ड राख्ने जिम्मा उनीमाथि थियो । घटना कसरी र किन भयो भन्ने विषयमा अनुसन्धान भइरहेको छ । न्यौपाने अछाम जिल्लाका स्थायी बासिन्दा हुन् ।
