बेरुत । राष्ट्रपति बशर अल–असदप्रति वफादार फौजलाई जबर्जस्त आक्रमणमा अलेप्पो कब्जा गरेको केही दिनपछि इस्लामवादी–नेतृत्वको विद्रोही बलले बिहीबार केन्द्रीय सिरियाली सहर हामालाई कब्जा गरेको छ ।
इस्लामवादी समूह हयात ताहरिर अल–शाम (एचटिएस) को नेतृत्वमा विद्रोहीहरूले सहरमा आक्रमण गरे र भीषण लडाइँपछि यसको जेल कब्जा गरेको र कैदीहरूलाई रिहा गरेको दाबी गरेका छन् ।
सिरियन अब्जर्भेटरी फर ह्युमन राइट्स वार मोनिटरका अनुसार रातभरको हिंसात्मक झडपपछि विद्रोहीहरू ‘धेरै पक्षबाट’ हामामा प्रवेश गरे र असदको सेनासँग सडकमा लडाइँमा संलग्न भए ।
बिहीबार दिउँसो सिरियाको सेनाले राजधानी र शक्ति केन्द्र दमास्कसको रक्षा गर्ने प्रयासमा महत्त्वपूर्ण मानिएको रणनीतिक रूपमा अवस्थित सहरको नियन्त्रण गुमाएको स्वीकार गरेको थियो ।
“पछिल्ला केही घन्टामा हाम्रा सैनिकहरू र आतङ्कवादी समूहहरू बीचको भिडन्त तीव्र भएपछि… यी समूहहरू सहरमा धेरै अक्षहरू तोड्न सक्षम भए र त्यहाँ प्रवेश गरे”, सहरबाहिर युनिटहरू पुनः तैनाथ गरिएको उल्लेख गर्दै सेनाले भन्यो ।
सिरियाली र रूसी हवाई फौजले गरेको गोलाबारी र आक्रमणका बावजुद हामाको पतन भएको राज्य मिडियाले बुधबार ढिलो रिपोर्ट गरेको छ ।
– विद्रोही नेताद्वारा गढको भ्रमण –
सिरियाका स्रोतहरूको नेटवर्कमा भर पर्ने अब्जर्भेटरीले गत हप्ता हिंसा भड्किएपछि सिरियामा ७२७ जना मानिस मारिएको बताएको छ । यसमा अधिकांश लडाकू तर १११ जना सर्वसाधारण पनि छन् ।
सन् २०११ मा लोकतन्त्र समर्थक प्रदर्शनको दमनसँगै सुरु भएको गृहयुद्धले पहिले नै ध्वस्त भएको देशमा सन् २०२० पछि यो सबैभन्दा तीव्र लडाइँ हो ।
विद्रोहीहरूको सफलताको महत्त्वपूर्ण कारक पछिल्लो हप्ता शुरू भएको आक्रमणमा अलेप्पो कब्जा गर्नु थियो । यो सहर दशकौँंदेखिको युद्धमा सरकारी हातबाट पूर्ण रूपमा कहिल्यै बाहिर गएको थिएन ।
एचटिएसका प्रमुख अबु मोहम्मद अल–जोलानीले बुधबार अलेप्पोको ऐतिहासिक गढको भ्रमण गरेका थिए ।
विद्रोहीको टेलिग्राम च्यानलमा पोस्ट गरिएका तस्बिरहरूमा जोलानीले ऐतिहासिक किल्लाको भ्रमण गर्दा खुला कारबाट समर्थकहरूलाई हात मिलाउँदै गरेको देखिएका थिए ।
अगाडि बढिरहेका विद्रोहीहरूले आफ्नो आक्रमणको सुरुमा थोरै प्रतिरोध पाएका भए पनि हामा वरपरको लडाइँ विशेष गरी भीषण भएको थियो ।
राज्य समाचार एजेन्सी सानाका अनुसार असदले प्रतिवेदनबमोजिम सैनिकहरूको तलब ५० प्रतिशतले बढाए । यसले उनका बलहरूलाई प्रतिआक्रमणका लागि बलियो बनाउन खोजिरहेको छ ।
अब्जर्भेटरीका अनुसार सरकारले ‘ठूलो सैन्य काफिला’ पठाए पनि सिरियाली सशस्त्र सेनालाई विद्रोहीहरूले पछाडि धकेलिदिएका थिए ।
निगरानी समूहका अनुसार बुधबारको लडाइँ त्यस्तो क्षेत्रको निकट थियो जहाँ मुख्य रूपमा अलावीहरू बस्छन । उनीहरू राष्ट्रपति समान शिया इस्लामको शाखाका अनुयायी हुन् ।
