काभ्रे । काभ्रेपलाञ्चोकको साँगास्थित नेपाल पुलिस स्कुलमा ३०औँ अन्तर माध्यमिक विद्यालय आइजीपी फुटबल रनिङ ट्रफी प्रतियोगिता–२०८१ मंगलबारदेखि सुरू भएको छ ।
प्रतियोगिताको नेपाल प्रहरी प्रधान कार्यालय प्रशासन विभागका प्रमुख एवं विद्यालय व्यवस्थापन समितिका अध्यक्ष प्रहरी अतिरिक्त महानिरीक्षक टेकप्रसाद राईले रेफ्रीलाई बल हस्तान्तरण गरी प्रतियोगिताको उद्घाटन गरे ।
प्रतियोगिताअन्तर्गत उद्घाटन खेलमा आयोजक नेपाल पुलिस स्कुल साँगा (रातो) टिमले काठमाडौँ युनिभर्सिटी हाइस्कुल धुलिखेललाई ३ का विरूद्ध शून्य गोल अन्तरले पराजित गर्यो । यस्तै आजै भएको दोस्रो खेलमा नेपाल एपिएफ स्कुल कीर्तिपुरले ल्याब स्कुललाई ३–० गोल अन्तरले हरायो ।
प्रतियोगितामा नेपाल पुलिस स्कुल साँगाका रातो र नीलो टिम, नेपाल पुलिस स्कुल धरान, चितवन, दाङ र सामाखुसी, सैनिक आवासीय माध्यमिक विद्यालय, सशस्त्र प्रहरी विद्यालयलगायत काठमाडौँ, भक्तपुर, ललितपुर र काभ्रेपलाञ्चोकको गरी १५ विद्यालयका १६ टिमको सहभागिता रहेको छ ।
उद्घाटनका अवसरमा राईले शिक्षा सँगसँगै अतिरिक्त क्रियाकलाप र सह–शिक्षात्मक गतिविधिमा विद्यार्थीलाई सहभागी गराउनुपर्ने आवश्यकता औँल्याउँदै बदलिँदो युगमा खेलकुदले विद्यार्थीलाई शारीरिक स्वास्थ्यता मात्र प्रदान नगरी वैयक्तिक सिर्जनशीलतामार्फत उनीहरूको व्यक्तिगत सीप विकासमा समेत टेवा पुर्याउने बताए ।
कार्यक्रममा आयोजक विद्यालयका प्राचार्य मोहन पौडेल, अखिल नेपाल फुटबल सङ्घका सहायक महासचिव बद्री भट्टराई, विद्यालयका समादेशक प्रहरी नायब उपरीक्षक मीनबहादुर कुँवर क्षेत्रीलगायतले प्रतियोगिताको सफलताको शुभकामना व्यक्त गरेका थिए ।
