काठमाडौं । राष्ट्रिय स्वतन्त्र पार्टीका सभापति रवि लामिछानेलाई चितवन लगिएको छ । मंगलबार बिहान लामिछानेलाई बुद्ध एयरको जहाजमार्फत चितवनको भरतपुर लगिएको हो ।
साहारा चितवन सहकारी लिमिटेडको रकम हिनामिना गरेको आरोपमा चितवन प्रहरीमा मंसिर ५ गते पूरक निवेदन दर्ता भएपछि बयानको लागि काठमाडौँबाट लामिछानेलाई सिधै चितवन लगिएको हो ।
लामिछानेको जिल्ला सरकारी वकिल कार्यालय काठमाडौँमा सोमबार बयान सकिएपछि उनलाई मंगलबार चितवन लगिएको हो । साहारा चितवन सहकारीको रकम हिनामिना अभियोगमा पूर्व डिआइजी छविलाल जोशी र रामबहादुर खनाललाई दुई दिन लगाएर बयान लिइएको थियो ।
उनीहरूलाई आइतबार चितवन ल्याएर सोमबार बयान सकिएको थियो । स्वर्णलक्ष्मी सहकारी ठगीसम्बन्धी अनुसन्धानका लागि केही दिनअघि लामिछानेलाई पोखराबाट काठमाडौं ल्याइएको थियो । अब चितवनमा बयान सकिएपछि उनलाई फेरि पोखरा लगिने प्रहरीले जनाएको छ ।
