काठमाडौं । चालु आर्थिक वर्षको पहिलो चार महिनामा ५ खर्ब रुपैयाँ भन्दा बढी रमिट्यान्स भित्रिएको छ । नेपाल राष्ट्र बैंकले बिहीबार सार्वजनिक गरेको चालु आर्थिक वर्ष २०८१/८१ को पहिलो चार महिनाको तथ्यांक अनुसार रेमिट्यान्स आप्रवाह ५ खर्ब २१ अर्ब ६३ करोड रुपैयाँ पुगेको छ । गतवर्षको तुलनामा रेमिट्यान्स ९.१ प्रतिशतले बढेको छ ।
अमेरिकी डलरमा विप्रेषण आप्रवाह ३ अर्ब ८७ करोड पुगेको छ । अघिल्लो वर्ष यस्तो आप्रवाह ३ अर्ब ६० करोड रहेको थियो । समीक्षा अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ) लिने नेपालीको संख्या १,४७,४७८ र पुनः श्रम स्वीकृति लिनेको संख्या ९४,१०५ रहेको छ ।
त्यस्तै चालु आर्थिक वर्षको चार महिनामा विदेशी विनिमय सञ्चिति १६ अर्ब ७० करोड अमेरिकी डलर रहेको छ । ०८१ असार मसान्तमा १५ अर्ब २७ करोड रहेको सञ्चिति कात्तिक मसान्त सम्ममा ९.४ प्रतिशतले बढेर १६ अर्ब ७० करोड डलर पुगेको छ ।
विदेशी विनिमय सञ्चितिमध्ये नेपाल राष्ट्र बैंकमा कात्तिक मसान्तमा २० खर्ब ८ अर्ब १५ करोड रुपैयाँ पुगेको छ । बैंक तथा वित्तीय संस्था (नेपाल राष्ट्र बैंकबाहेक) सँग कात्तिक मसान्तमा २ खर्ब ४७ अर्ब २० करोड रुपैयाँ रहेको छ ।
यो चार महिनाको आयातलाई आधार मान्दा बैकिङ्ग क्षेत्रसँग रहेको विदेशी विनिमय सञ्चिति १८ महिनाको वस्तु आयात र १५.१ महिनाको वस्तु तथा सेवा आयात धान्न पर्याप्त रहने छ ।
