काठमाडौं । नेपाल हङकङमा जारी हङकङ इन्टरनेसनल सिक्सेसको क्वाटरफाइनलमा श्रीलंकासँग ४० रनले पराजित भएको छ ।
शनिबार दिउँसो भएको खेलमा श्रीलंकाले दिएको १२४ रनको लक्ष्य पछ्याएको नेपाल ८३ रनमा अलआउट भयो । हारसँगै नेपालको यात्रा क्वार्टरफाइनलमा समाप्त भएको छ ।
नेपालका लागि राशिद खानले अर्धशतक बनाए पनि जितको लागि पर्याप्त हुन सकेन । उनले १८ बलमा १ चौका र ८ छक्का प्रहार गर्दै ५५ जोडे । अन्य खेलाडी श्रीलंकाका तीव्र गतिका बलरसामू टिक्न सकेनन् ।
नारायण जोशीले १३ रन बनाए । विवेक यादवले ५ र लोकेश बमले २ रन बनाए । कप्तान सन्दीप जोरा डकआउट भए । प्रतिश जिसी पनि डकआउट भए ।
श्रीलंकाका लागि लाहिरु समाराकून र थारिन्दु रथनायकेले २÷२ तथा धनन्जय लक्ष र लिहुरु मधुशंकाले १/१ विकेट लिए । पहिले ब्याटिङ गरेको श्रीलंकाले पूरै ६ ओभर खेलेर २ विकेटको क्षतिमा १२३ रन बनायो ।
श्रीलंकाका लागि सन्दुन विराक्कोडीले ५० र कप्तान लिहुरु मधुशंकाले अविजित ३१ रन बनाए । नेपालका लागि प्रतिश जिसी र नारायण जोशीले १÷१ विकेट लिए । यसअघि नेपालले इंग्ल्याण्ड र अष्ट्रेलियालाई पराजित गरेको थियो ।
