काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले आफूलाई झाँक्री बताउने प्रकाश भुजेलको गाडीको ठक्करबाट मृत्यु भएका नगरकोटी दम्पतीका छोराछोरीको अभिभावक बन्ने घोषणा गरेका छन् ।
सोमबार साँझ मृतकका परिवार भेट्न पुगेका अध्यक्ष प्रचण्डले गाडीको ठक्करबाट ज्यान गुमाएका ३८ वर्षीय नारायण नगरकोटी र उनकी जीवन संगिनी ३२ वर्षीया सानुमाया नगरकोटीलाई श्रद्धाञ्जली अर्पण गर्नुका साथै परिवारजनमा समवेदना प्रकट गरे ।
त्यसक्रममा अध्यक्ष प्रचण्डले कीर्तिशेष नारायण र सानुमायाका दुई छोरी गरिमा र अनु नगकोटीको अभिभावक बनेर परिवारको दुःखमा पार्टी र आफू सँगै रहने बताएको प्रचण्डको सचिवालयले जनाएको छ ।
गत कात्तिक २८ गते दिउँसो शंखरापुर नगरपालिका–९, स्थित साँखु–थली सडकखण्डमा प्रकाश भुजेलले चलाएको कारले मोटरसाइकललाई ठक्कर दिँदा नगरकोटी दम्पतीको मृत्यु भएको थियो । दुर्घटनापछि भुजेल अहिले प्रहरी हिरासतमा छन् ।
