बीबीसी । पाकिस्तानमा पूर्वप्रधानमन्त्री इमरान खानलाई जेलमुक्त गर्नुपर्ने मागसहित उनका समर्थक विरोध प्रदर्शनमा उत्रिएका छन् ।
हजारौँ विपक्षी प्रदर्शनकारीहरूले डि–चौक भनिने ठूलो चोकमा भेला भएर धर्ना दिने कार्यक्रम गर्न चाहेका थिए । उक्त स्थान राजधानीका सबै सरकारी निकायहरूको नजिकमा पर्दछ ।
नेता इमरान खानका समर्थकहरूको भिडलाई राजधानीको केन्द्रमा पुग्नबाट रोक्ने प्रयासमा सुरक्षा सैन्यसँग विभिन्न झडपका घटनाहरू भएका छन् भने भिडमाथि अश्रुग्यास र रबरका गोली प्रहार गरिएको छ ।
राजधानीका केही क्षेत्रमा सेना समेत परिचालन गरिएको छ । प्रहरीका अनुसार तीव्र गतिमा आइरहेको एक सवारीसाधनलाई रोक्ने प्रयास गरेका चार सुरक्षाकर्मीहरूको ज्यान गएको छ ।
पाकिस्तानका भूतपूर्व क्रिकेट खेलाडीसमेत रहेका नेता खान थुनामा रहँदा पनि देशको राजनीतिमा ठूलो र शक्तिशाली व्यक्तित्व बन्न पुगेका छन् ।
गत फेब्रुअरी महिनामा भएको निर्वाचनमा उनको पाकिस्तान तेहरिक–ए–इन्साफ (पीटीए) पार्टी प्रतिबन्धित थियो र आफ्ना उम्मेदवारहरूलाई स्वतन्त्र रूपमा निर्वाचनमा खडा गर्नुपरेको थियो। त्यसो हुँदा पनि उक्त पार्टी आफूले उठाएका स्वतन्त्र उम्मेदवारहरूको विजयी सङ्ख्याले गर्दा सबैभन्दा ठूलो एकल समूह बन्न सफल भएको थियो।
