काठमाडौं । इन्टरपोलबाट रेड नोटिस जारी भएका फरार प्रतिवादी पक्राउ परेका छन् । वैदेशिक रोजगारीमा ठगीलगायत मुद्दामा रेड नोटिस जारी भएका सिन्धुपाल्चोक मान्खाकी बिनु शाक्यलाई प्रहरीले पक्राउ गरेको हो ।
उनलाई एनसिबी कम्बोडियाको सहयोगमा पक्राउ गरी आइतबार नेपाल फिर्ता ल्याइएको प्रहरी प्रधान कार्यालयले जनाएको छ । उनले सिंगापुर पठाइदिन्छु भनि ४० जना भन्दा बढी व्यक्तिहरूबाट ५ करोड २ लाख ९४ हजार रूपैयाँ ठगी गरी फरार रहेको प्रहरीले जनाएको छ ।
फरार भएका शाक्य र उदयपुर त्रियुगा नगरपालिका–१० ठेगाना भएका सुजन आचार्यलाई अन्तर्राष्ट्रिय स्तरमा खोजतलास एवं पक्राउ गर्न प्रहरी प्रधान कार्यालय अपराध अनुसन्धान विभाग इन्टरपोल शाखामा अनुरोध भएपश्चात २०८० माघ १९ गते उनीहरूविरूद्ध रेड नोटिस जारी भएको थियो ।
असोज १ गते कम्बोडियाबाट दुवै जनालाई पक्राउ गरिएको थियो। पक्राउमध्ये सुजनलाई कात्तिक ९ गते नेपाल फिर्ता ल्याइएको थियो । बिनुलाई कारबाहीका लागि प्रहरी वृत्त कालिमाटीमा बुझाइएको छ।
