हेटौंडा । वाग्मती प्रदेश सरकारले फेरि मन्त्रालयको संख्या थपेको छ । बिनाविभागीय मन्त्री मधु श्रेष्ठलाई जिम्मेवारी तोक्नका लागि बहादुरसिंह लामा नेतृत्वको सरकारले मन्त्रालय फुटाएर संख्या थप गरेको हो ।
मंगलबार बसेको मन्त्रिपरिषद्को बैठकले संस्कृति, पर्यटन तथा सहकारी मन्त्रालयबाट सहकारीलाई अलग गरी नयाँ मन्त्रालय बनाउने निर्णय गरेको हो । अब सहकारी तथा गरिबी नियन्त्रण मन्त्रालय वाग्मती प्रदेशमा नयाँ बनेको छ । यस मन्त्रालयको जिम्मेवारी श्रेष्ठलाई दिने बताइएको छ ।
अब वाग्मती प्रदेशमा मन्त्रालयको संख्या १४ पुगेको सरकारका प्रवक्ता एवम् आन्तरिक मामिला तथा कानुनमन्त्री सुरजचन्द्र लामिछानेले जानकारी दिए । श्रेष्ठले मुख्यमन्त्री लामासँगै साउन ९ गते शपथ ग्रहण गरेका थिए । तर उनी हालसम्म बिनाविभागीय मन्त्रीका रूपमा रहेका छन् ।
