काठमाडौं। प्रमुख प्रतिपक्षी नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले आफूले तेस्रो प्रधानमन्त्रीत्व कार्यकाललाई १८ महिनासम्म टिकाउन सकेकोमा खुसी व्यक्त गरेका छन् ।
बुधबार ‘प्रचण्डपथः सडक कि सत्ता’ विषयक कान्तिपुर कन्क्लेभलाई सम्बोधनका क्रममा प्रचण्डले धेरै दिन टिक्लाजस्तो नलागे पनि आफू नेतृत्वको सरकार १८ महिना टिकेर सफल भएको बताए ।
‘मैले राम्रो काम गर्न सक्छौँ या सक्दैनौँ भनेर काम सुरु गरेको थिएँ । तर १८ महिनामा केही राम्रो काम गरेँ । मैले प्रधानमन्त्रीको शपथ लिँदा मलाई यस पटक चुनौती र अवर दुवै रहेको ठानेको थिएँ । म राम्रो गर्ने प्रयास गर्छु, नराम्रो गर्दिनँ भनेँ । सरकार कति दिन टिक्छ थाहा थिएन । एक दुई महिनामै जानसक्नेतर्फ पनि सचेत नै थिएँ । मेरो त ३२ सिट मात्रै थियो नि’, उनले भने, ‘जादु भने पनि म्याजिक भने पनि रियालिटी त्यही हो । त्यसकारण धेरै टिक्लाजस्तो लाग्दैन थियो । एक महिना भए पनि राम्रो गरेर छोड्छु, दुई महिना भए पनि राम्रो गरेर छोड्छु भनेकJ थिएँ । १८ महिना टिक्नु ठूलो कुरा भयो । त्यो १८ महिना मूलभूत रुपमा सफल भयो ।’
उनले माओवादी केन्द्र प्रतिनिधि सभामा प्रमुख प्रतिपक्षको हैसियतमा रहेको भन्दै त्यो पनि एउटा सत्ता भएको बताए ।
‘सैद्धान्तिक रूपमा वेटिग गर्भमेन्ट हो माओवादी । १२२ वटा पालिका छन् हाम्रो नेतृत्वमा । त्यो पनि सत्ता हो । अहिलेको संविधानले स्थानीय तहलाई पनि सरकार वा सत्ताका रूपमा मानेको छ’, प्रचण्डले थप भने, ‘र, सरकारले संविधान र लोकतन्त्र विरोधी जनविरोधी क्रियाकलाप गर्यो भने हामी खबरदारी गर्छौ । मैले प्रमुख प्रतिपक्षको हैसियतले सदनमा खबरदारी गरेको सबैले सुनेको स्थिति छ । अव सात ५३ वटै पालिकामा खबरदारी गर्दैछाँै । त्यसकारणले सडकमा पनि छौँ ।’
प्रचण्डले त्यस क्रममा सत्तारुढ दल नेपाली कांग्रेस र एमालेका नेता र प्रधानमन्त्री जहाँ जाँदा पनि विरोध र कालो झण्डा भेटिरहेको पनि बताए ।
तर आफूले भने जहाँ जाँदा पनि जनताको माया र सम्मान पाइरहेको दाबी गरे । प्रचण्डले साँच्चिकै परिवर्तन चाहेको थियो भन्ने जनताले बुझेको जिकिर उनले गरे ।
‘अहिले तपाईंले हेर्नुभयो भने दुईतिहाइवाला साथीहरू जनताबीचमा जाँदा कालो झण्डा र नाराबाजी भएको छ । म बाढीपहिरो पीडित जनतामाझ गएँ । त्यहाँ जनताको ठूलो माया र सम्मान पाएँ । जनताले अहिले प्रचण्ड सच्याउन खोजेकै हो भन्ने बुझेका छन्,’ दाहालले भने ।
प्रचण्डले विगतमा केही हदसम्म माओवादीहरू बिग्रिएको स्वीकार गरे । उनले भेडा र सिंहको कथा सुनाउँदै आफूहरू पनि भेडाको हुलमा हिँड्दा त्यस्तै बन्न लागेको बताए ।
अब माओवादीहरू सँच्चिने र भेडाहरूको भीडमा नमिसिने उनले बताए । दाहालले भने, ‘हामी माओवादीहरू त्यस्तै (सिंहजस्तै) थियौँ । भेडासँग हिँदाहिँड्दा अलिअलि भ्याभ्या गर्न थालियो । अब नगर्ने विचार छ मेरो,’
