काठमाडौं । प्रधानमन्त्री केपी शर्मा ओलीले आफ्नो आसन्न चीन भ्रमणबारे पूर्वप्रधानमन्त्री र परराष्ट्रमन्त्रीहरुसँग सुझाव लिएका छन् । सोमबार प्रधानमन्त्री कार्यालयमा प्रधानमन्त्री ओलीले सुझावका लागि उनीहरुलाई बोलाएका थिए ।
त्यसक्रममा पूर्वप्रधानमन्त्री एवं नेकपा एकीृकत समाजवादीका अध्यक्ष माधव नेपालले प्रधानमन्त्रीलाई चीन भ्रमण देशको हितमा उपयोग गर्न सुझाव दिएका छन् । उनले छिमेकीहरुको संवेदनशीलतालाई बुझेर र देशको हितमा ध्यान राखेर सम्झौता गर्न सुझाव दिए । उनले बीआरआई परियोजना राष्ट्रको हितमा रहेको भन्दै यसलाई स्वीकार गर्नुपर्ने बताए।
उनले भने, ‘बीआरआई नेपालको हितको विरुद्धमा छैन । नेपालजस्तो देशले लाभ लिनुपर्छ। लाभ लिने कुरामा सबैसँग समधुर सम्बन्ध राखेका छौं। बीआरआईलाई अघि बढाउनुपर्छ।’
