म्याग्दी । मङ्गला गाउँपालिका–३ र ४ मा पर्ने बरङ्जाका मगर समुदायले परम्परागत ‘आगोदेउ’ पर्व भव्य रूपमा मनाएका छन्। बरङ्जामा बसोबास गर्ने नौ थरका ४५ कुरिया मगरहरूले हरेक वर्ष कुकुर तिहारदेखि तीन दिनसम्म यो पर्व मनाउने गर्छन्।
आगलागीजन्य विपद् नहोस् भन्ने कामनासहित प्रकृतिको पूजा गरेर यो पर्व मनाउने परम्परा रहेको मङ्गला गाउँपालिका–३ का वडाध्यक्ष याम रोकाले बताए। “धार्मिक विधिअनुसार कुकुर तिहारको दिन सुरु हुने आगोदेउ पर्वमा प्रकृतिको पूजा गरिन्छ,” उनले भने, “आगोका कारण कुनै विपद् नहोस् भन्ने कामना गर्दै यो पर्व मनाउने चलन छ।”
पर्वको पहिलो दिन बरङ्जाको शिलाथुरस्थित थानमा मगरका झाँक्रीहरूले पूजा गरी पर्वको सुरुआत भएको मानिन्छ। दोस्रो दिन साँझ सो ठाउँमा भेडाको साँढलाई पूजा गरी बलि चढाइन्छ र आगो बाल्ने तथा मार्ने परम्परा निर्वाह गरिन्छ। तेस्रो दिनमा कमेरोले रङ्ग्याइएको ढुङ्गालाई काटेर पूजा गरेपछि यो पर्व सकिएको मानिन्छ।
बरङ्जामा पुन, घर्ती, रोका, राम्जाली रोका, बझाङ्गे रोका, गाउँथोके घर्ती, र बुढाथोकी थरका मगरहरूले आगोदेउ पर्वको संरक्षण गर्दै आएका छन्। वडाध्यक्ष रोकाका अनुसार, बाह्रौँ शताब्दीमा बरङ्जामा बसोबास सुरु भएदेखि नै यो पर्वलाई निरन्तरता दिँदै आएको हो।
बरङ्जाका मगरहरूले कात्तिकमा आगोदेउ र जेठमा धुले मेला विशेष धुमधामका साथ मनाउँछन्। जेठको दोस्रो अथवा तेस्रो हप्ताको मङ्गलबारदेखि तीन दिनसम्म मनाइने धुले पर्वपछि थर्पु गाउँमा परम्परागत मेला लगाउने चलन छ। हिउँदभरि खेतबारी सुकेर धुलैधुलो हुने र पानी परेपछि खेती गर्न योग्य हुने भएकाले त्यसको खुसीयालीमा धुले पर्व मनाउने गरिएको वडाध्यक्ष रोकाले जानकारी दिए।
