काठमाडौं । नेपाली कांग्रेसका महामन्त्री गगन थापाले माओवादी केन्द्रका अध्यक्ष पुष्पकमल दाहाल प्रचण्डले प्रधानमन्त्री बनिदिनुपर्यो भन्दै हप्तामा एकपटक खबर पठाउने गरेको बताएका छन् ।
बिहीबार काठमाडौंको कीर्तिपुरमा आयोजित चुनावी सभालाई सम्बोधन गर्दै महामन्त्री थापाले प्रचण्डले यस्तो प्रस्ताव गरेपनि आफूहरु यो गठबन्धनाई तीन वर्षसम्म लैजाने पक्षमा रहेको बताएका हुन् ।
उनले गठबन्धनलाई अगाडि लैजाने सन्दर्भमा इमान्दार रहेको बताए । उनले भने, ‘अहिले पनि प्रचण्डले हप्तामा एकपटक लौन प्रधानमन्त्री बनिदिनुपर्यो भनेर खबर पठाउनुहुन्छ । यो खबर पठाउने काम पहिला अर्कैले गर्थ्यो । हाम्रो दुश्मन कोही पनि छैन न प्रचण्ड हुनुहुन्थ्यो न केपी ओली नै । आज केपी ओलीसँग सरकारमा छौं । हामी इमान्दारितापूर्वक यो सरकारलाई तीन वर्ष पूरा गर्न चाहन्छौं । हामी सरकार तलमाथि गर्ने पक्षमा छैनौं । हामी परिणाम दिन चाहन्छौं।’
महामन्त्री थापाले कांग्रेस प्रधानमन्त्री बन्न नसक्ने भएकाले हिजो प्रचण्ड र आज ओलीलाई प्रधानमन्त्री बनाएर नहिंडेको बताए ।
उनले प्रचण्डले हतियार उठाउन लगाएर नेपालको दस वर्ष खेर गएको समेत बताए ।
उनले भने, ‘प्रचण्डजीले काम न काजको हतियार उठाउँदा नेपालको दस वर्ष खेर गयो। युवालाई रोजगारी दिनुपर्ने ठाउँमा बन्दुक बोक्न लगाएर, एके ४७ भारतबाट किन्ने कि चीनबाट किन्ने कि अमेरिकाबाट बारुद्ध ल्याउनेतिर लाग्यौं । तर, फेरि एकपटक मौका आएको छ। कतारभन्दा धेरै तलब यहाँ पाउने अवस्था बनाएरमात्रै आउँछन्। त्यो काम कांग्रेसले मात्र गर्न सक्छ।’
उनले कीर्तिपुरलाई सांस्कृतिक सहर बनाएर ललितपुर र भक्तपुरलाई जोड्न सकिने बताए। उनले स्थानीय सरकारले शिक्षा र स्वास्थ्यमा व्यापक काम गर्नुपर्ने आवश्यकता रहेको औंल्याए।
