काठमाडौं । अभिनेत्री अञ्जना बराइली चलचित्र ‘डोरी’मा अनुबन्ध भएकी छन् । चलचित्रमा अञ्जनालाई अनुबन्ध गरिएको निर्देशक अरुण लामाले बताए । लामाका अनुसार यो चलचित्रमा अञ्जनाको प्रमुख भूमिका रहनेछ । चलचित्र मंसिर दोस्रो साताबाट छायाँकन थाल्ने योजना छ ।
अञ्जनासँगै यस चलचित्रमा अभिनेता प्रकाश घिमिरे पनि अनुबन्ध भएका छन् । जी सेभेन प्रोडक्सनको ब्यानरमा निर्माण हुने यस चलचित्रमा यसअघि कलाकारहरू प्रवीण खतिवडा, शिशिर वाङ्देल, कविता आले, राज पौडेल, विशाल राई, मिलन राई, नूतन र वीरेन्द्र सिंह कुशवाहा अनुबन्ध भइसकेका छन् ।
चलचित्रमा हाँसो, त्रास र असफलतासहितको संघर्षलाई रोचक तरिकामा प्रस्तुत गरिने निर्देशक लामाले बताए । चलचित्रको लेखन निर्देशक अरुण लामाले नै गरेका छन् भने मनोज पण्डितले ‘स्क्रिप्ट डक्टरिङ’ गरेका छन् । यतिबेला अञ्जनाले अभिनय गरेको चलचित्र ‘पूर्ण बहादुरको सारङ्गी’ले तेस्रो हप्तामा पनि दर्शकको भरपुर साथ पाइरहेको छ ।
