काठमाडौं । सर्वाेच्च अदालतको प्रस्तावित न्यायाधीशमा नृपध्वज निरौला र नित्यानन्द पाण्डेयको नाम संसदीय सुनुवाइ समितिबाट अनुमोदन भएको छ ।
न्याय परिषद्ले उनीहरूको नाम सिफारिस गरेपछि शुक्रबार संसदीय समितिमा सुनुवाइ भएको थियो । समितिले दुवैको नाम सर्वसम्मत अनुमोदन गरेको हो । संसदीय सुनुवाइ समितिका ज्येष्ठ सदस्य पशुपति शम्सेर जबराले सर्वसम्मतिले निरौला र पाण्डेयको नाम अनुमोदन गरिएको जानकारी दिए ।
त्यसअघि बैठकमा निरौला र पाण्डेयले कार्ययोजना र अवधारणा प्रस्तुत गरेका थिए । बैठकमा उनीहरुले स्वतन्त्र, निष्पक्ष एवं सक्षम न्यायपालिकाको मूल्य मान्यतालाई आत्मसात् गर्दै सविधान, कानुन र न्यायका मान्य सिद्धान्तसमेतका आधारमा न्यायिक सम्पादन गर्ने प्रतिबद्धता जनाएका थिए ।
न्याय परिषद्को असोज ११ गतेको बैठकले उच्च अदालत पाटनका मुख्य न्यायाधीश निरौला र उच्च अदालत दाङ तुलसीपुर इजलासका मुख्य न्यायाधीश पाण्डेयलाई सर्वोच्च अदालतको न्यायाधीशमा सिफारिस गरेको थियो ।
