एजेन्सी । भारत उत्तर प्रदेशको झाँसीमा रहेको महारानी लक्ष्मीबाई मेडिकल कलेजमा आगलागी हुँदा १० जना नवजात शिशुको ज्यान गएको छ भने १६ जना घाइते भएका छन् ।
अस्पतालको नवजात शिशु सघन उपचार कक्ष (एन.आई.सी.यू.) मा आगो लागेको थियो । झाँसी जिल्लाका प्रसासनले १० जना नवजात शिशुको ज्यान गएको पुष्टि गरेको बी.बी.सी. ले जनाएको छ ।
शुक्रबार राति साढे १० बजेतिर एन.आई.सी.यू.भित्रको युनिटमा आगो लागेको थियो । विद्युत सर्ट भएर आगो लागेको अनुमान गरिएको समाचारमा उल्लेख गरिएको छ । दमकल सहितको टोली समयमै आइपुगेकाले धेरै बालबालिकालाई सुरक्षित उद्धार गरिएको अस्पतालले जनाएको छ ।
घटनाको छानबिनको लागि आयुक्त र डी.आई.जी.को सुपरिवेक्षणमा तत्कालै छानबिन समिति गठन गरिएको भारतीय सञ्चार माध्यमले जनाएका छन् । यूपीका मुख्यमन्त्री योगी आदित्यनाथले घटना प्रती दुख व्यक्त गरेका छन् ।
