काठमाडौँ । पूर्वप्रधानमन्त्री डा. बाबुराम भट्टराईले प्रधानमन्त्री केपी शर्मा ओलीलाई चीन भ्रमणका क्रममा आफ्नो सार्वभौमसत्तालाई ख्याल राख्न सुझाव दिएका छन् ।
सामाजिक संजालमार्फत भट्टराईले आफू गोरखामा रहेकाले छलफलमा सहभागी हुन नसक्ने भन्दै प्रधानमन्त्रीलाई यस्तो सुझाव दिएका हुन् ।
प्रधानमन्त्री ओलीले आज बिहान ११ बजे चीन भ्रमणका तयारीमा सन्दर्भमा पूर्वप्रधानमन्त्री र पूर्वपरराष्ट्रमन्त्रीहरुसँग छलफलका बैठक बोलाएका छन् ।
भट्टराईले दुई उदीयमान र प्रतिस्पर्धी शक्तिहरू चीन र भारत बीचको नेपालको विशिष्ट भूरणनीतिक, भूआर्थिक र भूराजनीतिक स्थितिलाई ध्यानमा राख्दै सबैसँग मैत्रीपूर्ण सम्बन्ध कायम गर्नेतर्फ सरकारले ख्याल गर्नुपर्ने उल्लेख गरेका छन् । उनले कमजोर अर्थतन्त्रलाई कम भन्दा कम समयमा विकसित चरणमा पुर्याउन वैदेशिक व्यापार, पूँजी, प्रविधि, ज्ञान र सद्भाव चाहिने उल्लेख गर्दै चीनको बीआरआईबाट फाइदा उठाउनै पर्नेमा जोड दिएका छन् ।
