काठमाडौं । नेकपा एमालेले नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले ‘चाइना कार्ड’ बारे दिएको अभिव्यक्तिप्रति आपत्ति जनाउँदी माफी माग्न आग्रह गरेको छ ।
एमालेको परराष्ट्र विभाग प्रमुख रघुवीर महासेठले शनिवार विज्ञप्ति जारी गरी प्रचण्डले भारतीय अखबार ‘द हिन्दु’सँगको अन्तर्वार्तामा गरेको टिप्पणीको घोर भर्त्सना गर्दै टिप्पणी फिर्ता गर्न र जनतासँग माफी माग्न आग्रह गरेका हुन् र प्रचण्डले प्रधानमन्त्री ओली र सरकारका बारेमा गरेको टिप्पणीमा चाइना कार्ड शब्द प्रयोग गरेका थिए ।
एमालेले प्रचण्डको उक्त अभिव्यक्ति आधारहीन, गैरजिम्मेवारपूर्ण र नेपालको सार्वभौम हित तथा परराष्ट्र नीतिमा ‘गम्भीर’ क्षति पुरयाउने खालको रहेको उल्लेख गरेको छ ।
त्यस्तो टिप्पणीले नेपालले सार्वभौम राष्ट्रका रूपमा आफैँ निर्णय लिन पाउने स्वतन्त्रताको अपमान गर्ने एमालेको ठहर छ । विज्ञप्तिमा भनिएको छ, ‘नेपाललाई कुनै पनि परराष्ट्रको अनुमोदन आवश्यक छैन । प्रधानमन्त्रीको चीन भ्रमण नेपालले पालना गरेको स्वतन्त्र परराष्ट्र नीतिको प्रतिविम्ब हो, न कि ‘कार्ड कूटनीति’को हिस्सा, जस्तो भ्रामक रूपमा दाबी गरिएको छ ।’
