काठमाडौँ । नेकपा माओवादी केन्द्रनिकट विद्यार्थी संगठन अखिल क्रान्तिकारीको स्थगित बन्द सत्र सुरु गर्न माग गर्दै तीन नेताले आमरण अनसन सुरु गरेका छन् ।
माओवादी केन्द्रको केन्द्रीय कार्यालय पेरिसडाँडामा मंगलबारदेखि विद्यार्थी नेता केशव रावल, खकेन्द्र रावल र जनक ढुंगानाले आमरण अनसन सुरु गरेका हुन् ।
अखिल क्रान्तिकारीको निवर्तमान केन्द्रीय उपाध्यक्ष केशव रावलको अग्रसरतामा सुरु भएको अनसनमा निवर्तमान केन्द्रीय सदस्य खकेन्द्र रावल र जनक ढुंगाना अनसन बसेरै सहयोग गरेका छन् ।
नेतृत्व चयन नगरी स्थगित भएको अखिल क्रान्तिकारीको बन्दसत्र यही मंसिर २३ गते नै सुरु गर्न र संगठनको नयाँ नेतृत्व चयनको लागि निर्वाचन सुनिश्चित गर्न माग गर्दै आमरण अनसन सुरु गरिएको निवर्तमान केन्द्रीय रावलको भनाइ छ ।
गत असोज १० गतेदेखि काठमाडौँमा सुरु भएको अखिल क्रान्तिकारीको २३ औँ राष्ट्रिय सम्मेलन नयाँ नेतृत्व चयन नै नगरी स्थगित भएको थियो।
