गण्डकी । गण्डकी प्रदेशसभा सदस्य विमला गौचनको अन्तिम बिदाइ गरिएको छ । कात्तिक २८ गते निधन भएकी गौचनको शव गण्डकी प्रदेशसभाको प्रांगणमा राखिएको थियो ।
शनिबार बिहान गण्डकी प्रदेश सभा सचिवालयले उनको श्रद्धाञ्जली कार्यक्रम राखेको हो । उनको अन्तिम बिदाइमा सांसद, सर्वसाधारण र आफन्तको जम्मा भएका थिए ।
गण्डकी प्रदेशकी समानुपातिक सांसद गौचनलाई मुख्यमन्त्री सुरेन्द्रराज पाण्डे, मन्त्रीहरू, विभिन्न दलका नेता, सांसद कांग्रेस गण्डकी सभापतिलगायतले श्रद्धाञ्जली अर्पण गर्दै दुःख व्यक्त गरे । मुख्यमन्त्री पाण्डे, मन्त्रीहरूलगायतले सांसद गौचनको शवमा नेपालको झण्डा ओढाएका थिए ।
गत महिना दामोदर कुण्ड जाँदा लेक लागेर बिरामी परेकी गौचनलाई पछिल्लो पटक डेंगु संक्रमण भएको थियो । स्वास्थ्य अवस्था गम्भीर बनेपछि उनलाई ग्रान्डी पुर्याइएको थियो ।
तर उनको उपचारका क्रममा निधन भएको थियो । बिस २०१८ सालमा मुस्ताङको कोबाङमा जन्मिएकी गौचन महिला संघ म्याग्दीको अध्यक्ष पनि भएकी थिइन् भने उनी होटल व्यवसायमा पनि आवद्ध थिइन् ।
