काभ्रेपलाञ्चोक । नेकपा (माओवादी केन्द्र) का अध्यक्ष एवं पूर्वप्रधानमन्त्री पुष्पकलम दाहाल ‘प्रचण्ड’ले विपद्का बेलामा सबैले मिलेर सहयोग गर्नुपर्ने बताएका छन् । काभ्रेपलाञ्चोकको बाढीपहिरो प्रभावित क्षेत्र पनौती नगरपालिका–१२ भूमेडाँडा रोशी बजार क्षेत्रको स्थलगत निरीक्षण गर्दै अध्यक्ष दाहालले विपद्का बेलामा सबै मिलेर जनताका पक्षमा काम गर्न लाग्नुपर्नेमा जोड दिए ।
भुमेडाँडा रोशी बजार क्षेत्रका बाढी प्रभावित स्थानीय नागरिकको अवस्थाका बारेमा जानकारी लिदै उनले सत्ता र प्रतिपक्ष भनेर एकअर्कालाई दोषारोपण गर्नुभन्दा सबै मिलेर जनताको पीरमर्कामा मल्हमपट्टी लगाउनेगरी खोज, उद्धार, राहत र पुनःस्थापनाको काममा केन्द्रित हुन सबैलाई आग्रह गरे । रोशी बजार क्षेत्रमा मानवीय र भौतिक क्षति बढी नै रहेको उल्लेख गर्दै अध्यक्ष दाहालले जनताका पीडाबारे जानकारी लिन तथा दसैँ, तिहारको मुखमा जनताको घाउमा मल्हमपट्टी के–कसरी लगाउन सकिन्छ भनेर बुझ्न आएको बताए ।
विगतमा विनाशकारी भूकम्पका बेलामा पनि आफू प्रतिपक्षी दलको नेताको हैसियतले सरकारलाई सक्दो सहयोग गरेको उनले स्मरण गरे । उनले सरकारलाई जनताका पक्षमा काम गर्न आग्रह गर्दै सरकारले थालेका सकारात्मक काममा आफ्नो पार्टीले साथ दिने बताए ।“मौसमविद्हरुले अविरल वर्षा हुँदैछ है भनेर सचेत गराएका थिए ।
सरकारलाई पूर्वानुमानअनुसार खोज, उद्धार र राहतको सबै तयारी गर्न आग्रह गरेको थिए । अहिले क्षति भइसकेपछि पनि खोज, उद्धार, राहत र पुनःस्थापनाको काममा लाग्नका निम्ति ढिला गर्न हुँदैन”, अध्यक्ष दाहालले भने । यसबारेमा सरकार र राजनीतिक दलहरुबीच छलफल गर्ने उनको भनाइ थियो ।अध्यक्ष दाहालले रोशी क्षेत्रमा बढी क्षति हुनुको कारण यहाँका खानी र क्रसर उद्योग रहेको उल्लेख गर्दै क्रसर उद्योग र खानीबारे नीतिगतरुपमा नै सोच्नुपर्ने सरकारलाई सुझाव दिने बताए ।
उनले जिल्ला प्रशासन कार्यालयबाट जिल्लाको समग्र मानवीय र भौतिक क्षतिका विषयमा जानकारी लिदै साथै धुलिखेल अस्पतालमा उपचाररत बिरामीलाई भेटेर उनहरुको उपचारका बारेमा भइरहेको प्रयास र बिरामीको अवस्थाबारे जानकारी लिएका थिए । अध्यक्ष दाहालको साथमा यहाँ आएका सांसद सूर्यमान दोङले खोज, उद्धार, राहत र अस्थायी बासस्थान निर्माणका साथै पुनःस्थापनाका लागि काम गर्न आवश्यक रहेकामा जोड दिए । उनले तत्काल ठाउँ ठाउँमा खाद्यान्न, स्वास्थ्य, खानेपानी र पुनःस्थापनाका लागि विद्युत्, सञ्चार र सडक सञ्जालको आवश्यक रहेकाले बिपी राजमार्गलाई अस्थायीरुपमा सञ्चालन गर्न आवश्यक पहलकदमीका साथ काम भइरहेको बताए ।
बागमती प्रदेशसभा सदस्य रत्नप्रसाद ढकालले तत्कालका लागि खानेपानी, खाद्यान्नको अभाव र क्षति भएकालाई अस्थायी बासस्थानका लागि सङ्घीय सरकारले पहल गर्न आवश्यक रहेको बताए । जिल्ला समन्वय समितिका प्रमुख दीपककुमार गौतमले अस्थायी रुपमा बाटो जोड्न उपकरण ठाउँ ठाउँमा भए पनि इन्धन पुर्याउन गाह्रो भइरहेकाले त्यसका लागि पहलकदमी लिन आग्रह गरे ।
प्रमुख जिल्ला अधिकारी उमेशकुमार ढकालले घाइते र समस्यामा परेकाको उद्धारको काम जारी रहेको बताए । सहायक प्रमुख जिल्ला अधिकारी सुवास पौडेलले जिल्लामा हालसम्ममा घाइते तथा अन्य समस्यामा परेका गरी सात सय ७१ जनाको नेपाली सेनाको हेलिकप्टरमार्फत र अन्य तीन हजार दुई सय ९९ जनाको समेत उद्धार गरिएको, ६ सय घर जोखिममा रहेकामा त्यहाँ बस्दै आएका नागरिकलाई सुरक्षित स्थानमा सारिएको, राहत तथा स्वास्थ्योपचारको व्यवस्था गर्ने लगायतका काम भइरहेको जानकारी दिए ।
यही असोज ११ र १२ गते आएको बाढी पहिरोबाट हालसम्म जिल्लामा ६९ जनाको मृत्यु, ७२ जना घाइते तथा सातजना बेपत्ता भएका सहायक प्रजिअ पौडेलले बताए । घाइतेमध्ये ५० जना उपचारपछि घर फर्किसकेका छन् बाइस जना अझै अस्पतालमा उपचाररत छन् । जिल्लाका पनौती नगरपालिका, रोशी गाउँपालिका, तेमाल गाउँपालिका, बेथानचोक गाउँपालिका, चौँरीदेउराली गाउँपालिका र मण्डनदेउपुर नगरपालिका बाढीपहिरोबाट बढी प्रभावित भएका छन् ।
