लुम्बिनी । बाँकेकी निर्मला कुर्मीलाई बेपत्ता पारेको आरोप लागेका लुम्बिनी प्रदेशका वन तथा वातावरणमन्त्री बादशाह कुर्मीले पदबाट राजीनामा दिएका छन् ।
मंगलबार उनले मुख्यमन्त्री चेतनारायण आचार्यसमक्ष राजीनामा दिएका हुन् । मन्त्री भएपछि उनको बारेमा चौतर्फी विरोध भएको थियो । उनी बाँकेको निर्वाचन क्षेत्र ३ (२) बाट निर्वाचित भएका थिए । शाहलाई साउन ९ गते कांग्रेसबाट बिनाविभागीय मन्त्री बनाइएको थियो ।
मुख्यमन्त्री आचार्यले साउन १८ गते कुर्मीलाई वन तथा वातावरण मन्त्रीको जिम्मेवारी तोकेका थिए । कुर्मीविरुद्ध कर्तव्य ज्यान मुद्दा र ठगीमा अनुसन्धान चलिरहेको छ । उनलाई निर्मलादेवी कुर्मीको अपहरण र बेपत्ता पार्ने कार्यमा संलग्न रहेको आरोप छ । मन्त्री कुर्मीलाई बर्खास्त गर्न विभिन्न संघ–संस्थाले माग गर्दै आएका थिए ।
कांग्रेस लुम्बिनी प्रदेश समितिलेसमेत पार्टी सभापति शेरबहादुर देउवालाई ध्यानाकर्षण पत्र बुझाएर कुर्मीलाई मन्त्री बनाउने निर्णयमा पुनर्विचार गर्न आग्रह गरेको थियो ।
२०७५ सालमा एकाएक हराएकी निर्मलाको जग्गा हत्याउन कुटपिट गर्ने र अपहरण गरी बेपत्ता पार्ने काममा मन्त्री कुर्मीको संलग्नता रहेको प्रहरी अनुसन्धानले देखाएको थियो । तर राजनीतिक पहुँचका भरमा कुर्मी कारबाही भएको छैन ।
