बीबीसी । अमेरिकी पूर्वराष्ट्रपति डोनल्ड ट्रम्पको फ्लोरिडास्थित आफ्नै गल्फ कोर्समा उनलाई ‘हत्या गर्ने दोस्रो प्रयास’ भएको तर उनी सुरक्षित रहेको अमेरिकी अधिकारीहरूले बताएका छन् ।
घटनामा संलग्न भएको भनिएका एकजना ’सम्भावित संदिग्ध’लाई हिरासतमा लिइएको छ । ‘सीक्रेट सर्भिस एजेन्टहरू’ले झाडीबाट राइफलले ताक्दै गरेको देखेको र लगत्तै उनीहरूले ती व्यक्तिमाथि गोली प्रहार गरेको अधिकारीहरूको भनाइ छ। त्यस बेला ट्रम्प त्यहाँ गल्फ खेलिरहेका थिए ।
राइफल ताकिँदै गर्दा ट्रम्प २७५ देखि ४५५ मिटरजति मात्र टाढा रहेको एफबीआईले जनाएको छ । एउटा एके–४७ जस्तै बन्दुक, दुईवटा झोला, एउटा गोप्रो क्यामेरालगायतका सामग्री घटनास्थलमा फेला परेका छन् । प्रत्यक्षदर्शीका अनुसार ती सन्दिग्ध व्यक्तिलाई पछि सुरक्षाकर्मीले धेरै पटक गोली प्रहार गरेका थिए। त्यसपछि कोही झाडीबाट भागेर कालो निसान कारमा हामफालेको देखिएको थियो ।
ती प्रत्यक्षदर्शीले उक्त गाडी र त्यसको नम्बर प्लेटको तस्बिर लिएका थिए। त्यो गाडी पछि मार्टिन काउन्टीमा रोकियो । ‘हामीले मार्टिन काउन्टी शेरफको कार्यालयलाई सचेत गरायौँ। उनीहरूले गाडी देखे र गाडीबाट तानेर उक्त पुरुषलाई नियन्त्रणमा लिए’ पाम बीच काउन्टीका शेरफ रिक ब्राडशले भने ।
‘त्यसपछि हामीले घटनाका प्रत्यक्षदर्शीलाई ल्याएर देखाउँदा उनले झाडीबाट भाग्दै गरेको र कारमा बसेको व्यक्तिको रूपमा उसलाई पहिचान गरे,’ उनले पत्रकार सम्मेलनमा भने । अमेरिकी सञ्चारमाध्यमहरूले पक्राउ परेका व्यक्ति हवाई निवासी ५८ वर्षका पुरुष रहेको जनाएका छन् । आफ्ना समर्थकहरूलाई पठाएको इमेलमा ट्रम्पले आफू ‘सुरक्षित र राम्रो अवस्थामा“ रहेको बताएका छन् ।
‘कुनै पनि कुराले मलाई पछाडि धकेल्न सक्दैन,’ उनले लेखेका छन्, ‘म कहिल्यै पनि आत्मसमर्पण गर्दिनँ!’ यसअघि पेन्सिल्भेनिआको एउटा चुनावी र्यालीमा एक जना बन्दुकधारीले ट्रम्पमाथि गोली प्रहार गरेका थिए । त्यस क्रममा उनको कानमा गोली लागेको थियो। उनको हत्या प्रयासका रूपमा उक्त घटनालाई हेरिएको थियो । पेन्सिलभेनिआमा भएको आक्रमणको दुई महिनापछि पछिल्लो घटना भएको हो।
