लमजुङ । लमजुङ क्व्होलासोथर गाउँपालिका–५ सिङ्दी र वडा नंं ६ पसगाउँ क्षेत्रमा बाढीपहिराले सडक बगाउँदा तीन हप्तादेखि सवारी साधन सञ्चालनमा समस्या भइरहेको छ । पोखरा–सिङ्दी–पसगाउँ सडक गत साउन १२ गते रुदीखोलाले बगाउनुका साथै विभिन्न स्थानमा पहिरो झरेर अवरुद्ध भएयता यहाँका स्थानीय पैदल यात्रा गर्न बाध्य छन् ।
गाउँपालिकाले दिएको जानकारीअनुसार उक्त सडकअन्तर्गत कास्कीको मादी गाउँपालिका–८ उगीकुनासहित लमजुङतर्फ विभिन्न स्थानमा खोलाले कटान गर्नुका साथै दर्जनबढी ठाउँमा पहिरा खसेका छन् ।
वडा नंं ५ का वडा महिला सदस्य वर्तामाया गुरुङले गाडी गुड्ने सडक तथा पैदल यात्रा गर्ने बाटो नै बाढीपहिराले अवरुद्ध भएपछि जोखिमपूर्ण यात्रा गर्नुपरेको बताइन् ।
“ठाउँ ठाउँमा पहिरो गएर सडक अवरुद्ध भएको छ । रुदीखोला पुलभन्दा २० मिनेट तल पनि सडक बगाएको छ । सहजताका लागि खोलामाथि भ¥याङ राखेर जोखिमपूर्ण यात्रा गरिरहेका छौँ”, उनले भनिन् ।
पोखरा र रामबजार हुँदै बेँसीसहर जानका लागि पनि यही बाटो प्रयोग हुने गरेकाले छ । जसले यहाँका धेरै नागरिक प्रभावित भएका वडा नं ६ पसगाउँका आइतजङ गुरुङले गुनासो गरे । “पसगाउँसम्म आउने सडक अवरुद्ध हुँदा स्थानीयलाई पैदल हिँड्डुल गर्न पनि जोखिम छ । यतिबेला यहाँ सवारीसाधन चल्ने अवस्था छैन, जसले निकट समयमै खाद्यान्न सामग्रीको अभाव हुने अवस्था आउँदैछ”, उनले भने ।
क्व्होलासोथर गाउँपालिका उपाध्यक्ष गमीमाया गुरुङले सो सडकमा ठूलो क्षति पुगेकाले तत्काल सडक सञ्चालन गर्न नसकिएको बताइन् । सडक खुलाउन पालिकासँग बजेट अभाव भएकाले सम्बन्धित निकायमा पहल भइरहेको उनको भनाइ छ ।
पूर्वाधार विकास कार्यालय लमजुङका निमित्त प्रमुख विवेक सिग्देलले सडकअन्तर्गत कास्की र लमजुङको दुवैतर्फ ठूलो क्षति भएको र सडक खुलाउने प्रयास गरे पनि पानी नघटेकाले समस्या भएको बताए ।
