काठमाडौं । सहकारी संस्थाको बचत रकम दुरुपयोग सम्बन्धमा संसदीय छानबिन विशेष समितिले राष्ट्रिय स्वतन्त्र पार्टीका सभापति रवि लामिछानेसहित २६ जनासँग बयान लिने भएको छ ।
संसदीय विशेष समितिले यसअघि विज्ञ, सरोकारवाला, समितिको कार्यादेशमा समावेश भएको सहकारीका बचतकर्ताहरुसँग छलफल र आवश्यक प्रमाण संकलन गरिसकेको छ ।
अब समितिले ती सहकारी ठगीको आरोप लागेर थुनामा रहेका र थुनाबाहिरै रहेकाहरुसँग सोधपुछ गर्न लागेको बताइएको छ । उनीहरुलाई प्रहरी अनुसन्धान जसरी नभएर वास्तविक तथ्य पत्ता लगाउनका लागि सोधपुछ गर्न लागिएको बताइएको छ ।
मङ्गलबार समितिको कार्य प्रगति सुनाउँदै समिति सभापति सूर्य थापाले लामिछानेसहित शिवशिखर सहकारी अध्यक्ष केदारनाथ शर्मा, कान्तिपुर सहकारी पूर्वअध्यक्ष तथा पशुपति सहकारी अध्यक्ष सीबी लामा लगायत २६ जनासँग सोधपुछ गर्ने निर्णय भएको बताए ।
