धनगढी । परराष्ट्रमन्त्री डा आरजु राणा देउवाले मुलुकको सुदूरपश्चिम क्षेत्रको विकासका लागि आफू प्रतिबद्ध रहेको बताएकी छन् ।
गौरा पर्व मनाउन बुधबार धनगढी पुगेकी परराष्ट्रमन्त्री डा. राणाले आफू यस क्षेत्रको विकासका लागि प्रतिबद्ध रहेको बताइन् । यस क्षेत्रको विकासबारे भारत सरकारसँग पनि कुरा उठाएको उनले बताइन् ।
धनगढी उपमहानगरपालिका-४ मा निर्मित आधारभूत स्वास्थ्य केन्द्र एवम् वडा कार्यालय भवनको उद्घाटन गर्दै उनले भारत भ्रमणका क्रममा गौरीफन्टा नाकालाई पूर्ण क्षमतामा चलाउन स्तरोन्नतिबारे कुरा राखेको जानकारी पनि दिइन् ।
‘केही वर्षमात्रै अघि तत्कालीन प्रधानमन्त्री शेरबहादुर देउवा भारत भ्रमणका बेला यो नाकाबारे कुरा राख्नुभएको थियो । यो नाका सुदूरपश्चिमत्रकै एक ‘लाइफा लाइन’ हो’, उनले भनिन्, ‘त्यसैले यस पटकको भ्रमणमा मैले हाम्रातर्फबाट कुरा राखेको छु । भारतीय पक्षबाट पनि केही लिखित प्रस्ताव मागिएको छ । हामी यो नाकाको स्तरोन्नति गरी पूर्ण क्षमतामा चलाउने प्रक्रिया अघि बढाउने छौँ ।’
त्यसैगरी भारत भ्रममणकै क्रममा धनगढीको फाप्लामा निर्माण हुने बहुउद्देश्यीय खेलमैदानबारे कुरा उठाएको उनले बताएकी छन् ।
लामो समयदेखि कांग्रेसको नेतृत्वको सरकारले विकास निर्माणका काम गर्दै आएको स्मरण गर्दै उनले स्थानीय सरकारलाई बलियो बनाउने गरी संवैधानिक व्यवस्था गर्ने जिकिर गरिन् ।
गौरा पर्व मनाउन बिहान धनगढी पुगेकी मन्त्री राणाले त्यहाँस्थित निवासमा पूजा गरेकी थिइन् । उनलाई धनगढी विमानस्थलमा सुदूरपश्चिम प्रदेशका मुख्यमन्त्री कमलबहादुर शाह, मन्त्रीहरू, प्रदेशका उच्च सरकारी अधिकारी तथा कांग्रेसका स्थानीय कार्यकर्ताले स्वागत गरे ।
