काठमाडाैँ । राष्ट्रिय सभा सदस्यहरूले बाढीपीडितलाई समयमै राहत दिन सरकारसँग माग गरेका छन् । राष्ट्रिय सभाको आजको बैठकको शून्य समयमा उनीहरूले प्राकृतिक विपतबाट पीडित भएकाहरूलाई चाँडोभन्दा चाँडो राहतका साथै बसोवासको प्रबन्ध मिलाउन जोड दिए ।
राष्ट्रिय सभा सदस्य सुमित्रा विसीले बाढीपहिरोजस्ता प्राकृतिक विपतबाट पीडितलाई राहत उपलब्ध गराउनु राज्यको दायित्व भएको बताए । उनले गत कात्तिकमा जारजरकोट केन्द्रविन्दु बनाएर गएको भूकम्पबाट पीडितलाई हालसम्म राहत उपलब्ध नगराएको, पालमुनि बस्दा दैनिक जीवन कष्टकर बनेकाले यसतर्फ सरकारको ध्यानाकर्षण गराए ।
सांसद शारदादेवी भट्टले सरकार बाढीपहिरो आउनुपूर्व उद्धार र राहतको तयारीमा जुट्नुपर्ने बताइन् । सांसद तुलसाकुमारी दाहालले विद्यालय शिक्षा कमजोर बन्दै गइरहेको भन्दै शैक्षिक अवस्था सुधार गर्न सरोकारवाला गम्भीर हुनुपर्नेमा जोड दिइन्।
सांसद मृगेन्द्रसिंह यादवले किसानले सुलभ रूपमा मल पाउनुपर्ने बताए। यसैबीच आज विनियोजन विधेयक, २०८१ अन्तर्गत विभिन्न शीर्षकमध्ये विभिन्न मन्त्रालयका विषयमा उठेका प्रश्नको सम्बन्धित मन्त्रीहरूले जवाफ दिने कार्यतालिका छ ।
