खोटाङ । मनसुनजन्य विपद् न्यूनीकरण एवं प्रतिकार्यका लागि खोटाङमा जिल्ला विपद् सहायता कक्ष स्थापना गरिएको छ । सम्भावित घटनाका पीडितको उद्धार र राहत वितरण प्रभावकारी बनाउन जिल्ला प्रशासन कार्यालय परिसरमा विपद् सहायता कक्ष स्थापना गरिएको हो ।
मनसुनजन्य विपद्मा परेकाको उद्धार र राहत वितरण प्रभावकारी बनाउन सहायता कक्षको भूमिका महत्वपूर्ण हुने जिल्ला विपद् व्यवस्थापन समितिका संयोजक एवं प्रमुख जिल्ला अधिकारी शिवकुमार कार्कीले बताए ।
‘विपद् प्रतिकार्यका लागि समन्वय तथा सहजीकरण गर्न सहायक प्रमुख जिल्ला अधिकारीको संयोजकत्वमा समिति बनाइएको छ । यो समितिले विपद्मा परेकाको उद्धार र राहत वितरण प्रभावकारी तथा व्यवस्थित गर्न भूमिका खेल्छ’, उनले भने ।
जिल्ला विपद् व्यवस्थापन समितिले सबै स्थानीय तहहरूमा स्थानीय विपद् सहायता कक्ष स्थापना गरी सञ्चालन गर्न अनुरोध गर्ने निर्णय गरेको छ । मनसुन अवधिभर विपद् प्रतिकार्य, राहत वितरण र उद्धारका लागि सम्बन्धित निकाय, सरोकार भएका सबै पक्षलाई तयारी अवस्थामा राख्ने निर्णय गरिएको संयोजक कार्कीले जानकारी दिए ।
मुख्य राजमार्ग बाढीपहिरोको कारण अवरुद्ध हुन सक्ने हुँदा सम्बन्धित सडक आयोजनालाई सडक अवरुद्ध हुनासाथ तत्काल सञ्चालनमा ल्याउन तथा स्थानीय सडक सञ्चालन हुने अवस्थामा राख्न स्थानीय तहहरुलाई अनुरोध गरिएको छ ।
जिल्लामा हुनसक्ने मनसुनजन्य सम्भावित विपद्का घटनालाई मध्यनजर गर्दै जिल्ला अस्पताल, जिल्ला आयुर्वेद अस्पताल, स्थानीय तहका अस्पताल तथा स्वास्थ्यचौकीलाई विपद्जन्य उपचारका लागि तयारी अवस्थामा रहन निर्देशन दिइएको समितिले जनाएको छ ।
दश स्थानीय तह रहेको जिल्लामा मनसुनजन्य विपद्अन्तर्गत बाढीबाट ८५ घरधुरीका तीन सय २० र पहिरोबाट चार सय ३९ घरधुरीका एक हजार सात सय ६१ जना उच्च जोखिममा रहेको जनाइएको छ । जिल्ला प्रहरी कार्यालयले विपद्जन्य घटना आइपरेमा तत्काल उद्धार गरेर राख्न सकिने सुरक्षित ठाउँसमेत पहिचान गरेको छ ।
जिल्लामा रहेका विद्यालय तथा सार्वजनिक भवनमा छ हजार आठ सय ५५ जनालाई राख्न सकिने जिल्ला प्रहरी प्रमुख प्रहरी नायब उपरीक्षक पुरुषोत्तम खड्काले बताए । केही दिनदेखि लगातार वर्षा भए पनि जिल्लामा अहिलेसम्म ठूलो घटना घटेको छैन ।
अविरल वर्षाले ग्रामीण सडक अवरुद्ध छन् । ग्रामीण सडक अवरुद्ध भएपछि जिल्लाका स्थानीय तहहरू राष्ट्रिय सडक सञ्जालबाट विच्छेद भएका छन् । स्थानीय तहसँग जोडिएको सबै ग्रामीण सडक अहिलेसम्म कच्ची भएकोले समस्या भएको यातायात व्यवसायीको भनाइ छ ।
सगरमाथा लोकमार्गअन्तर्गत दिक्तेल–गाईघाट सडक पनि अवरुद्ध छ । राजधानी काठमाडौँ जोड्ने मध्यपहाडी लोममार्ग भने सञ्चालनमा रहेको प्रहरीले जनाएको छ ।
मध्यपहाडी लोकमार्गको ठाउँठाउँमा झरेको पहिरोले केही समय अवरुद्ध भए पनि अहिलेसम्म पूर्णरुपमा अवरुद्ध नभएको प्रनाउ खड्काले जानकारी दिए।
