जनकपुरधाम । मधेश प्रदेश सरकारको आर्थिक वर्ष २०८१/८२ को नीति तथा कार्यक्रम प्रदेश सभामा प्रस्तुत गरिएको छ । मंगलबार प्रदेश प्रमुख सुमित्रा सुवेदी भण्डारीले प्रदेश सभाको बैठकमा नीति तथा कार्यक्रम प्रस्तुत गरेकी हुन् ।
प्रदेश सरकारको नीति तथा कार्यक्रममा कृषि, शिक्षा, स्वास्थ्य, रोजगार, खेलकुद, भौतिक पूर्वाधार, वन वातावरण, सुशासनलाई प्राथामिकता दिइएको छ ।
मधेशका १३६ पालिकालाई लक्षित गरी नमुना कृषि विकासका लागि ‘एक पालिका एक कृषि उत्कृष्टता केन्द्र’ तयार गरिने उल्लेख गरिएको छ ।
त्यस्तै मधेशका प्रत्येक जिल्लामा नमुनाको रुपमा १/१ वटा खुला शैक्षिक पार्क तयार गर्ने, मधेश प्रदेशको तथ्याङ्कलाई भरपर्दो र विश्वासिलो बनाउन आफ्नै डिजिटल तथ्याङ्क बैङ्क स्थापन गर्ने पनि निति तथा कार्यक्रममा उल्लेख गरिएको छ ।
ठोस योजनामार्फत पत्रकारहरूको क्षमता अभिवृद्धिको कार्यक्रम सञ्चालन गरिने र वैदेशिक लगानी भित्र्याउन मधेश लगानी सम्मेलन गरिने पनि नीति तथा कार्यक्रममा उल्लेख छ । प्रदेशमा भ्रष्टाचार नियन्त्रण गर्दै मितव्ययी शासन व्यवस्था सञ्चालनका साथै विकास खर्च बढाउने नीतिलाई उच्च प्राथमिकतामा राखिएको छ ।
सरकारले ल्याएको निति तथा कार्यक्रममा दुर्व्यसनमा परेका युवाहरुमा सुधार ल्याउनका लागि कार्यक्रम सञ्चालन गरिने उल्लेख गरिएको छ । त्यसका लागि प्रत्येक जिल्लामा सहिद पुर्नस्थापना केन्द्र स्थापना गरिने छ ।
.
घुमौ मधेश–बुझौ मधेश
सरकारले अगामी आर्थिक वर्षमा घुमौ मधेश–बुझौ मधेश कार्यक्रम सञ्चालन गर्ने नीति लिएको छ । प्रदेश सरकारको नीति तथा कार्यक्रममा पर्यटन प्रवद्धनका लागि पर्यटन बोर्ड गठनदेखि जयनगरबाट रेल चढेर आउने पर्यटकलाई एकैठाउँमा बस्ने व्यवस्था हुनेगरी धर्मशाला निर्माणसम्मको योजनालाई प्राथमिकतामा राखिएको छ ।
मिथिला क्षेत्रमा धार्मिक तथा साँस्कृतिक पर्यटन, ग्रामिण भेगमा ग्रामिण पर्यटन, नदी तथा वन क्षेत्रमा साहसिक पर्यटन र राजमार्ग क्षेत्रमा मनोरञ्जनात्मक पर्यटनका कार्यक्रमहरु सञ्चालन गर्ने सरकारको नीति छ ।
त्यस्तै, रुपनीमा केवुलकार सञ्चालन गर्नेदेखि लिएर अन्तर्राष्ट्रिय वैवाहिक स्थलको रुपमा विकास गरी सामूहिक विवाहका कार्यक्रम सञ्चालन गर्न सरकारले अनुदानको व्यवस्था गर्ने जनाएको छ ।
पूर्णपाठ
https://drive.google.com/file/d/1H_3GOzSAEXOrHugRw67_1sSMG9lW51MA/preview
