काठमाडौं । सहकारीको रकम दुरुपयोगबारे छानबिन गर्न गठित संसदीय छानबिन विशेष समितिले कार्यविधि बनाएको छ । समितिले शुक्रबार कार्यविधिलाई अन्तिम रूप दिएको हो ।
कार्यविधिमा गोरखा मिडिया नेटवर्क प्रालिको कार्यालयमा स्थलगत अनुगमन गर्ने र सञ्चालक र व्यवस्थापकसँग पनि बयान लिइने उल्लेख छ ।
कार्यविधिमा भनिएको छ, ‘संकटग्रस्त सहकारी संस्थाका अध्यक्ष, सञ्चालक वा व्यवस्थापक र व्यवस्थापकीय भूमिकामा रहेका अन्य व्यक्ति, अनुसूची–२ मा उल्लिखित सहकारी संस्थाहरूबाट रकम प्रवाह भएका गोरखा मिडिया नेटवर्क प्रालिलगायत अन्य कम्पनी वा संस्थाहरूका तत्कालीन र वर्तमान सञ्चालक, व्यवस्थापक वा व्यवस्थापकीय भूमिकामा रहेका अन्य व्यक्तिहरूमाथि सोधपुछ गर्ने छ ।’
समितिले सभाका अन्य विषयगत समिति, मन्त्रालय, विभाग, राष्ट्र बैंक र निकायहरूसँग समन्वय गर्नसक्ने जनाइएको छ । त्यस्तै निर्णय गर्दा बैठकबाट सर्वसम्मति नभएमा बहुमत सदस्यबाट निर्णय गरिने कार्यविधि बनाइएको छ । सहकारी रकम अपचलनबारे छानबिन गर्न ७ सदस्यीय समिति गठन गरिएको छ । समितिलाई तीन महिनाको समय दिइएको छ ।
https://drive.google.com/file/d/1IsgmjimfTqsWGRCuRKR4ARJDzyXRjAXP/preview
