वीरगन्ज । नेकपा एमालेका अध्यक्ष केपी शर्मा ओलीले नेपाली कांग्रेसले सहकारी ठगीको छानबिन गर्न संसदीय समिति नचाहेको आरोप लगाएका छन् ।
शुक्रबार बाराको प्रसौनी गाउँपालिकाको नवनिर्मित प्रशासनिक भवनको उद्घाटन गर्दै अध्यक्ष ओलीे कांग्रेसले संसदीय समिति नभई सरकार चाहेको आरोप लगाएका हुन् ।
उनले सरकारबाट बाहिरिएर छट्पटाइरहेको कांग्रेस अहिलेको सरकारका काम देखेर अत्तालिएको बताए । उनले भने, ‘गृहमन्त्री रवि लामिछानेविरुद्ध संसदीय छानबिन समितिको माग गरिरहेको कांग्रेसलाई छानबिन समिति चाहिएको होइन। उसलाई त सरकार चाहिएको छ ।’
उनले आफूलाई लोकतन्त्रको मसिहा भनाउँदो कांग्रेसबाट संसदमा भइरहेको अराजकता अशोभनीय रहेको बताए । अध्यक्ष ओलीले एमालेले मिसन ८४ को नारा लिएर अगाडि बढिरहेको भन्दै देशको विकास गर्नका लागि एमालेले नयाँ समीकरणको सरकार बनाएको बताए ।
