काठमाडौं। संसदको जारी अवरोध खुलाउने विषयमा प्रधानमन्त्री पुष्पकमल दाहाल प्रचण्ड र प्रमुख प्रतिपक्ष नेपाली कांग्रेसका नेताहरुबीच छलफल सुरु भएको छ।
प्रधानमन्त्री निवास बालुवाटारमा जारी छलफलमा नेपाली कांग्रेसका सभापति शेरबहादुर देउवा, उपसभापति पूर्णबहादुर खड्का, महामन्त्री गगन थापा, कृष्णप्रसाद सिटौला र प्रमुख सचेतक रमेश लेखक सहभागी छन्।
सहकारी ठगी प्रकरणमा संसदीय छानविन समिति गठनको माग गर्दै नेपाली कांग्रेसले संसद अवरुद्ध पार्दै आएको छ। तर संसदीय छानविन समिति गठन आवश्यक नभएको भन्दै सत्ता पक्ष आफ्नै अडानमा रहेपछि सहमति जुट्न सकेको छैन। सोही विषयमा सहमति खोज्न प्रधानमन्त्री दाहालले पहल लिएका हुन्।
संसदको बजेट अधिवेशनको पहिलो दिन कांग्रेसले संसदीय छानविन समिति गठनको माग गर्दै संसद अवरुद्ध पारेको थियो। सरकारले जेठ १ गते नीति तथा कार्यक्रम प्रस्तुत गर्ने तयारी गरिरहँदा कांग्रेसले बैठक अवरुद्ध पार्ने संकेत दिएपछि प्रधानमन्त्री दाहाल सहमतिका लागि अग्रसर भएका हुन्।
