सिरियाका एक चौथाइभन्दा बढी नागरिक चरम गरिबीमा बाँचिरहेका विश्व बैङ्कले शनिबार सार्वजनिक रिपोर्टमा उल्लेख गरेको छ । “विनाशकारी गृहयुद्धको १३ वर्ष बितिसक्दा पनि शान्ति स्थापना नहुँदा सिरियाली अर्थतन्त्र खराब बनेको र लाखौं मानिस ‘चरम गरिब’ को सूचीमा रहेका छन्,” विश्व बैङ्कको रिपोर्टमा भनिएको छ ।
विश्व बैङ्कले सिरियाबारे दुई नयाँ प्रतिवेदन प्रकाशित गर्दै ‘२७ प्रतिशत सिरियाली अर्थात् करिब ५७ लाख मानिस चरम गरिबीमा बाँचिरहेका’जनाएको हो । अरब राष्ट्र सिरियामा द्वन्द्व अघि चरम गरिबी लगभग अस्तित्वहीन थियो तर सन् २०२२ सम्ममा द्वन्द्वले चारमध्ये एकभन्दा बढी सिरियालीलाई प्रभावित गरेको र गत वर्षको विनाशकारी भूकम्पपछि यो अवस्था थप खराब भएको हुन सक्ने रिपोर्टमा उल्लेख छ ।
भूकम्पका कारण करिब छ हजार मानिसको मृत्यु भएको थियो । संयुक्त राष्ट्रसङ्घका अनुसार करिब ९० प्रतिशत सिरियालीहरू गरिबीमा बाँचिरहेका छन् भने एक दशकभन्दा लामो युद्धपछि करिब २० लाख मानिस चरम गरिबीमा बाँचिरहेका छन् ।
प्रतिवेदनमा सन् २०१९ को अन्त्यतिर छिमेकी लेबनानको आर्थिक मन्दी, कोभिड–१९ महामारी र युक्रेनमा जारी युद्धका कारण सिरियाली घरपरिवारको कल्याणमा ह्रास आएको उल्लेख गरिएको छ । सिरियामा जारी गृहयुद्धले अर्थतन्त्र, पूर्वाधार र उद्योगधन्दा समेतलाई तहसनहस बनाएको छ भने पश्चिमा प्रतिबन्धले सिरियाको समस्या बढाएको छ ।
“‘निरन्तर आर्थिक अभाव र मानवीय सहायतामा सीमित पहुँच’ ले गरिब सिरियालीहरूलाई थप तनावमा पारेको छ र यसले पहिले नै ‘बढ्दो मूल्य, अत्यावश्यक सेवाहरूमा पहुँच कम भएको र बढ्दो बेरोजगारी’ को सामना गरिरहेको छ,” विश्व बैङ्कले भनेको छ ।
संयुक्त राष्ट्रसङ्घले यसअघि एएफपीलाई सन् २०२४ का लागि सिरियाका लागि मानवीय सहायता योजनाका लागि चार अर्ब अमेरिकी डलरभन्दा बढी आवश्यक पर्ने बताएको थियो । अन्तर्राष्ट्रिय समुदायले सोमबार ब्रसेल्समा सिरियाका लागि वार्षिक प्रतिबद्धता सम्मेलनमा आर्थिक सहयोग जुटाउने प्रयास गर्ने भएको छ ।
अवसरको अभाव र घट्दो सहायताका कारण धेरै सिरियालीहरू बाँच्नका लागि विदेशमा रहेका आफन्तबाट पठाएको पैसामा भर पर्न बाध्य भएका छन् र विश्व बैङ्कले ‘सन् २०२२ मा सिरियाली घरपरिवारले प्राप्त गर्ने विप्रेषणको कुल मूल्य करिब एक अर्ब ५ करोड अमेरिकी डलर पुगेको’ अनुमान गरेको छ ।
सन् २०२३ मा सिरियाको कुल गार्हस्थ्य उत्पादन ६.२ अर्ब अमेरिकी डलर रहेको अनुमान गरिएको छ । सिरियाको कुल गार्हस्थ्य उत्पादन सन् २०२३ मा १.२ प्रतिशतले घटेको थियो भने सन् २०२४ मा थप १.५ प्रतिशतले खुम्चिने अनुमान गरिएको छ । मुद्राको अवमूल्यनको असरका साथै निरन्तर अभाव र खाद्यान्न तथा इन्धनका लागि थप अनुदान कटौतीका कारण सन् २०२४ मा मुद्रास्फीति उच्च रहने अनुमान प्रतिवेदनमा उल्लेख छ ।
सन् २०११ मा दमास्कसले सरकार विरोधी प्रदर्शनमाथि दमन गरेपछि सुरु भएको सिरियाली युद्धमा पाँच लाखभन्दा बढी मानिसको मृत्यु भइसकेको छ भने लाखौं विस्थापित भएका छन् ।
