काठमाडौं । प्रमुख प्रतिपक्षी दल नेपाली कांग्रेसले प्रधानमन्त्री पुष्पकमल दाहाल प्रचण्डले प्रतिपक्षीको नाराबाजीकाबीच विश्वासको मत लिएर लोकतन्त्रको मूल्यमान्यता मिचेको आरोप लगाएको छ ।
सोमबार संसद बैठकपछि बसेको पार्टी संसदीय दलको बैठकले केही सहकारी ठगलाई बचाउन लोकतन्त्रको मून्ल्यमान्यता मिचेको निष्कर्ष निकालेको हो । कांग्रेस प्रमुख सचेतक रमेश लेखकले संसदमा प्रतिपक्षलाई बोल्न नदिएर सत्तापक्षले बहुमतको दम्भ देखाएको बताए ।
उनले भने, ‘सत्तापक्ष सहकारी ठगी गर्ने केही व्यक्तिलाई बचाउनका लागि संसदीय मूल्य मान्यता, परम्परालाई कमजोर गरेर पनि केही ठगलाई बचाउन उद्दत भएको छ। यसको पछाडि सत्ता पक्षको बहुमतको दम्भ छ । लोकतन्त्र र संसदीय मूल्यमान्यता उलंघन नगर्न चेतावनी आजको बैठकले दिएको छ ।’
उनले विश्वासको मत लिने समय अझै केही हप्ता बाँकी रहे पनि बलमिच्याइँ गरिएको बताए । उनले भने,‘संसदलाई ब्यारेक जस्तो बनाएर विश्वासको मत लिने नाटक गरेको छ । पार्टी विषेशको कार्यकर्ता जस्तो भएर प्रस्तुत हुनु सभामुखलाई शोभनीय हुँदैन ।’
