चार सैनिकको मृत्यु हुनेगरी भएको रकेट हमलाको जवाफमा केरेम शालोम सीमा क्रसिङ बन्द गरेको चार दिनपछि इजराइलले बुधबार गाजाका लागि मानवीय सहायताका लागि उक्त सीमा पुनः खोलेको बताएको छ ।
अन्तर्राष्ट्रिय समुदायले दान गरेको खाना, पानी, आश्रय उपकरण, औषधि र चिकित्सा उपकरणसहित मानवीय सहायता बोकेका इजिप्टबाट ट्रकहरू क्रसिङमा आइपुगेको सेनाले प्यालेस्टिनी नागरिक मामिला निरीक्षण गर्ने रक्षा मन्त्रालयको निकाय कोगाटसँगको संयुक्त विज्ञप्तिमा जनाएको छ ।
निरीक्षण गरेपछि क्रसिङको गाजा छेउमा आपूर्ति हस्तान्तरण गरिने सेनाले जनाएको छ । इजराइल र उत्तरी गाजाबीचको इरेज सीमा पनि प्यालेस्टिनी क्षेत्रमा सहायता वितरणका लागि खुला रहेको विज्ञप्तिमा उल्लेख छ । आइतबार हमासको रकेट आक्रमणमा चार जना सैनिक मारिनुका साथै एक दर्जनभन्दा बढी घाइते भएपछि केरेम शालोम क्रसिङ बन्द गरिएको थियो ।
मङ्गलबार इजराइली सेनाले सहरको पूर्वी क्षेत्रमा आक्रमण गरेपछि गाजा र इजिप्टबीचको रफाह क्रसिङको प्यालेस्टिनी हिस्सा नियन्त्रण कब्जा गरेको थियो । संयुक्त राष्ट्रसङ्घ र इजराइलको कट्टर सहयोगी संयुक्त राज्य अमेरिका दुवैले अनिकालको सामना गरिरहेका नागरिकहरूका लागि जीवनरेखा भएका दुई क्रसिङ बन्दको निन्दा गरेका छन् ।
