न्यूयोर्क । अमेरिकाको न्यूयोर्कमा भूकम्प गएको छ । स्थानीय समय अनुसार बिहानै १० बजेर २३ मिनेटमा ४ दशमलव ८ रेक्टर स्केलको भूकम्प गएको अन्तराष्ट्रिय सञ्चार माध्यमहरुले बताएका छन् ।
भूकम्पपछि न्युयोर्क सिटीले थप आपतकालिन अलर्टहरु जारी गर्दै पराकम्पहरु आउनसक्ने चेतावनी दिएको छ । युएस जियोलोजिकल सर्भेका अनुसार उक्त भूकम्पको केन्द्र न्युजर्सीको ह्वाइटहाउस स्टेशनबाट ७ किलोमिटर उत्तरपूर्वमा रहेको छ ।
हालसम्म मानवीय क्षतिको विवरण आइसकेको छैन । न्युयोर्क सिटीले न्युयोर्कका बासिन्दाहरुलाई घरभित्र बस्न सुझाव दिएको छ । आपतकालिन अलर्टहरु स्थानीयहरुको मोबाइलमा पठाइएको छ ।
उक्त भूकम्प २४१ बर्षको इतिहासमा सबैभन्दा ठूलो भएको पनि बताइएको छ । युएस जियोलोजिकल सर्भेको तथ्यांक अनुशार सन् १७८३ मा न्युजर्सी केन्द्रबिन्दु भएर ४ दशमलव ९ रेक्टर स्केलको भूकम्प गएदेखि न्युयोर्क सिटी क्षेत्रमा त्यती ठूलो भूकम्प गएको थिएन ।
त्योभन्दा अगाडि भने सन् १७३७ मा न्युयोर्क सिटी क्षेत्रलाई केन्द्रबिन्दु बनाएर ५ दशमलव २ रेक्टर स्केलको भूकम्प गएको थियो ।
