काठमाडौं । नेपाली कांग्रेसका महामन्त्री गगन थापाले संवैधानिक राजनीतिक रूपमा काम गरेर चुनावी प्रणाली सुधार गर्नुपर्ने बताएका छन् । बुधबार सामाजिक संजालमार्फत भिडियो सन्देशमार्फत महामन्त्री थापाले चुनावअघि गठबन्धन गर्न नहुने बताएका हुन् ।
उनले चुनावअघिको गठबन्धन गर्ने र सानो दलले सत्ता बार्गेनिङ गर्ने प्रणालीलाई कमजोर बनाएको बताए । उनले कुनै अलमलमा नपर्न कार्यकर्ता र नेतृत्व पंक्तिमा आह्वान गरेका छन् ।
महामन्त्री थापाले प्रचण्डको नियतनै धोका दिने भएकाले आज नभए भोलि धोका दिन्थे भन्दै अलमलमा नपर्न आग्रह गरे । उनले यो गठबन्धन हिँड्न त परै जाओस् आफ्नै भारीले थिचिएर फतक्क कुहिएर झर्ने बताए ।
‘यो सरकार यसरी बनेको छ, दौडिने त कुरै छोड्नुस् हिँड्न पनि सक्दैन । आफ्नै भारीले थिचिन्छ, फतक्क कुहिएर झर्छ,’ उनले भने ।
उनले भने, ‘गठबन्धन कुनै राजनीतिक स्थायित्वका लागि गरिएको अभ्यास नभएर बाँडीचुडी खान सत्ता स्वार्थमा टिकेको अवसरवादी गठबन्धन हो ।’ उनले २ सय ३२ भन्दा बढी पालिका २ हजार ६ सयभन्दा बढी वडामा उत्कृष्ट काम गर्नुपर्ने बताए । जनतालाई निराशाबाट बाहिर निकाल्न कांग्रेसले वडा, स्थानीय, प्रदेश र संघीय संसदबाट भूमिका खेल्नुपर्ने उनको भनाइ छ ।
