काठमाडौं । नेकपा माओवादी केन्द्रको पदाधिकारी बैठक बोलाइएको छ । प्रधानमन्त्री समेत रहेका अध्यक्ष पुष्पकमल दाहाल प्रचण्डले मंगलबार बिहान बस्ने गरि माओवादी केन्द्रको पदाधिकारी बैठक बोलाएका हुन् ।
बैठकमा नेताहरुको कार्यविभाजनसहित पछिल्ला समसामयिक राजनीतिक घटनाक्रमबारे छलफल हुने एजेन्डा रहेको छ ।
माओवादी केन्द्रका उपाध्यक्ष कृष्णबहादुर महरा सुन तस्करी प्रकरणमा पक्राउ परेपछि पदाधिकारी बैठक बस्न लागेको हो ।
महरामाथि विद्युतीय चुरोट (भेप)मा सुन तस्करी गरेको आरोप छ । महराका छोरा राहुलविरुद्ध पनि मुद्दा चलिरहेको छ । राहुलले त्रिभुवन अन्तर्राष्ट्रिय विमानस्थल भन्सारमा समातिएको सुन छुटाउन दबाब दिएको आरोप लागेको छ ।
महरामात्रै नभइ पार्टी निकट अखिल क्रान्तिकारीका महासचिव दीपेश पुन पनि सहकारी ठगी प्रकरणमा पक्राउ परेका छन् । उनको नाम सुन तस्करी प्रकरणमा पनि जोडिएको छ ।
