पर्सा । पर्सामा अवैध लागु औषध चरेससहित २ जना पक्राउ परेका छन् । वीरगन्ज महानगरपालिका–८ घण्टाघरस्थित नारायणी गेस्ट हाउसबाट १२ किलो २ सय ४० ग्राम चरेससहित भारत विमान थाना जमुवजारी ग्राम डुमरा बस्ने २२ वर्षीय आरिफ रजासहित अर्का १ जनालाई प्रहरीले पक्राउ गरेको छ ।
विशेष सूचनाको आधारमा खटिएको प्रहरीले गेस्ट हाउस तलासी गर्दा चरेस फेला पारी दुवै जनालाई पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको छ ।
यस्तै सुनसरीबाट प्रहरीले करिब १ सय ६५ किलो गाँजा बरामद गरेको छ । भोक्राहानर्सिंङ गाउँपालिका–६ उराव टोलबाट अवैध लागू औषध गाँजा बरामद गरिएको हो ।
प्रहरी चौकी चिरौलीचोकबाट खटिएको प्रहरीले उक्त स्थानमा बेवारिसे अवस्थामा रहेको डब्लुबि ०६ इ ३१७९ नम्बरको भारतीय कारको डिकीमा उक्त परिमाणको गाँजा फेला पारी बरामद गरेको हो । यस सम्बन्धमा अनुसन्धान जारी छ ।
