युक्रेनका राष्ट्रपति भोलोदिमिर जेलेन्स्कीले दक्षिणी सीमावर्ती गाउँ रोबोटाइनमा सेनाको भ्रमण गरेको बताएका छन् । गत गृष्मयाममा रुसी सेनाबाट फिर्ता लिइएको रोबोटाइनले पुनः आक्रमणको सामना गरिरहेको छ ।
किएभले गत वर्ष अगस्टमा दक्षिणी जापोरिजिया क्षेत्रको यस सानो गाउँलाई पुनः कब्जा गरेको थियो । यसलाई रुसी सेनाविरुद्धको जवाफी आक्रमणमा ठूलो सफलताको रूपमा हेरिएको छ । त्यसबेलादेखि रोबोटाइनमा रुसी सेनाले लगातार आक्रमण गरिरहेको छ र यो गाउँ दक्षिणी मोर्चामा मुख्य हटस्पटमध्येको एक बनेको छ ।
जेलेन्स्कीले सामाजिक सञ्जालमा भनेका छन्, “जापोरिजिया क्षेत्र । रोबोटाइन । ६५औँ मेकेनाइज्ड ब्रिगेडको स्थान । मैले रक्षकहरूसँग कुराकानी गरेँ, उनीहरूलाई धन्यवाद दिएँ र राज्य पुरस्का प्रदान गरेँ, आज यहाँ हुनु सम्मानको कुरा हो ।”
फेसबुकमा पोस्ट गरिएको भिडियोमा राष्ट्रपति जेलेन्स्कीलाई भूमिगत जस्तो देखिने अँध्यारो कोठामा वर्दीमा सैनिकहरूसँग भेट गरेको देखिन्छ ।
“आज यहाँ आएर तपाईंहरूलाई पुरस्कृत गर्नु मेरा लागि सम्मानको कुरा हो किनकी तपाईंहरूको काँधमा दुश्मनलाई पछाडि धकेल्न र यो युद्ध जित्न यति कठिन र निर्णायक मिसन छ”, जेलेन्स्कीले सैनिकहरूलाई भने, “म तपाईंहरूको विजयको कामना गर्दछु, तपाईंहरूलाई पुरस्कृत गर्न चाहन्छु र यो विजयलाई चाँडै हासिल गर्नका लागि सबैथोक गर्नुहोस् भन्ने चाहन्छु ।”
६५औँ ब्रिगेडले गत वर्ष रोबोटाइन गाउँमा आक्रमणको नेतृत्व लिएको थियो । रोबोटाइनमाथि पुनः कब्जालाई किएभको सफलताको रूपमा स्वागत गरिएको थियो तर मस्कोसँग गुमेका क्षेत्रहरू फिर्ता लिनका लागि युक्रेनको प्रयास त्यसबेलादेखि सुस्त भएको छ ।
