विश्व स्वास्थ्य सङ्गठन (डब्ल्यूएचओ) र अमेरिकी सेन्टर फोर डिजीज कन्ट्रोल एन्ड प्रिभेन्शन (सीडीसी)ले सन् २०२३ को अन्त्ययता बालबालिकामा दादुराको जोखिम बढ्दै गएको चेतावनी दिएका छन् ।
धेरै वर्षदेखि दादुराविरुद्ध खोप लगाउने क्रम घट्न थालेको छ । सीडीसीले जनाएअनुसार दादुराको सङ्क्रमण अहिले विश्वको सबै भागमा देखा परिरहेको छ । दादुरा भाइरसको अधिकांश सङ्क्रमण यमन, भारत र काजकस्तानमा देखा पारेको छ ।
डब्ल्यूएचओ र सीडीसीको पछिल्लो संयुक्त प्रतिवेदनमा सन् २०२२ मा अघिल्लो वर्षको तुलनामा दादुराका बिरामी १८ प्रतिशतले बढेको र विश्वव्यापी रूपमा मृतकको सङ्ख्या ४३ प्रतिशतले बढेको जनाएको छ । योसँगै दादुरा भएका मानिसको अनुमानित सङ्ख्या ९० लाख र मृतकको सङ्ख्या एक लाख ३६ हजार पुगेको छ। तीमध्ये अधिकांश बालबालिका छन् ।
डब्ल्यूएचओले गत वर्ष युरोपमा दादुराको सङ्क्रमण ३० गुणले बढेको र त्यो भयानक भएको जनाएको छ । सन् २०२३ मा उक्त महादेशभर ३० हजार भन्दा बढी मानिसमा सङ्क्रमण देखिएका थियो । सन् २०२२ मा सङ्क्रमितको सङ्ख्या जम्मा ९४१ थियो ।
सङ्क्रमित व्यक्तिले खोक्दा वा हाच्छिउँ गर्दा निस्किने ससाना कणमा यो दादुराको भाइरस हुन्छ । ती कण सास फेर्दा शरीरभित्र प्रवेश गरेको अवस्थामा वा तपाईँले तिनलाई छोएर आफ्नो हात, नाक वा मुखनजिक लैजानुभयो भने पनि यो रोग तपाईँलाई लाग्न सक्छ ।
