पोखरा । थ्रीस्टार क्लब पोखरामा जारी आहा रारा पोखरा गोल्डकपको फाइनलमा प्रवेश गरेको छ । बुधबार भएको पहिलो सेमिफाइनल खेलमा जावलाखेल युथ क्लवलाई १–० गोलले पराजित गर्दै थ्रीस्टार फाइनलमा प्रवेश गरेको हो ।
थ्रीस्टारलाई जित दिलाउन दिपेश घलेले निर्णायक गोल गरे । पहिलो हाफ गोलरहित बराबरीमा सकिएको खेलको ७८ औं मिनेटमा दिपेशले थ्रीस्टारका लागि गोल गरेका हुन् ।
दिपेश थ्रीस्टारका लागि वैकल्पिक खेलाडीका रुपमा मैदान प्रवेश गरेका थिए । खेलको ६६औं मिनेटमा दिपेश आदित्य शाक्यको स्थानमा मैदान प्रवेश गरेका थिए । उनले दिपेश आलेको पासमा गोल गरेका हुन् ।
थ्रीस्टारले अब उपाधिका लागि दोस्रो सेमिफाइनलको विजेतासँग खेल्नेछ । भोली हुने दोस्रो सेमिफाइनल खेलमा विभागीय क्लव त्रिभुवन आर्मी क्लवले ए डिभिजन लिगको च्याम्पियन चर्च ब्वाइजसँग खेल्नेछ । फाइनल खेल शनिबार हुनेछ ।
