सियोल । उत्तर कोरियाले दक्षिण कोरियाका दुई टापुनजिकै शुक्रबार २०० भन्दा बढी तोपगोला प्रहार गरेको सियोलको रक्षा मन्त्रालयले जनाएको छ । सन् २०१० मा उत्तर कोरियाले एउटा टापुमा गोलाबारी गरेपछि दुई कोरियाबीच भएको सबैभन्दा गम्भीर सैन्य तनावका कारण दुई टापूका बासिन्दालाई सुरक्षित स्थानमा जान आदेश दिइएको थियो ।
प्योङयाङमा किम जोङ उन नेतृत्वको सरकारले दक्षिण कोरिया र उसको अमेरिकी सहयोगीविरुद्ध युद्धका लागि तयार रहेको बारम्बार चेतावनी दिएपछि शुक्रबारको प्रत्यक्ष गोलीबारी भएको हो ।
“उत्तर कोरियाली सेनाले स्थानीय समय अनुसार शुक्रबार योनप्योङ टापुको जाङसान–गोटको उत्तरी भाग र उत्तरी क्षेत्रमा बिहान ९ः०० देखि ११ः०० सम्म २०० भन्दा बढी चरण तोप आक्रमण गरेको छ,” दक्षिण कोरियाली रक्षा मन्त्रालयका एक अधिकारीले पत्रकारहरूसँगको संक्षिप्त कुराकानीमा भने ।
“यो उत्तेजक कार्य हो र यसले कोरियाली प्रायद्वीपको शान्तिलाई खतरामा पारेको छ,” मन्त्रालयले जारी गरेको विज्ञप्तिमा भनिएको छ ।
विज्ञप्तिमा भनिएको छ, “हामी उत्तर कोरियालाई यस बढ्दो सङ्कटको पूर्ण जिम्मेवारी वहन गर्न कडा चेतावनी दिन्छौं र ती कार्यहरू तत्काल रोक्न जोडदार आग्रह गर्दछौं ।
“हाम्रो सेनाले संयुक्त राज्य अमेरिकासँगको समन्वयमा स्थितिलाई नजिकबाट नियालिरहेको छ र उत्तर कोरियाको उक्साहटको जवाफमा उचित कदम चाल्नेछ,” उनले भने ।
योनप्योङ टापुका स्थानीय अधिकारीहरूले एएफपीलाई बताएअनुसार सर्वसाधारणलाई सुरक्षित स्थानमा जान भनिएको छ र यो आदेशलाई युद्ध ‘रोकथामको उपाय’ को रूपमा वर्णन गरिएको छ ।
दक्षिण कोरियाको योनप्योङ टापु पहेँलो सागरमा अवस्थित छ । यो उत्तर कोरियाको इन्चोनबाट लगभग ८० किलोमिटर पश्चिम र ह्वाङ्हाई प्रान्तको समुद्री तटबाट १२ किलोमिटर दक्षिणमा पर्छ ।
बाङ्न्योङ टापुका अधिकारीहरूले पनि त्यहाँबाट उद्धार आदेश जारी गरेको जानकारी दिएका छन् ।
“हामी अहिले उद्धारको घोषणा गरिरहेका छौं,” बाङ्न्योङ टापुका एक स्थानीय जिल्ला अधिकारीले एएफपीसँग भने, “दक्षिण कोरियाली सेनाले चाँडै नै नौसैनिक अभ्यास गर्ने जानकारी पाएको छु ।”
“सुरुमा मलाई यो हाम्रो आफ्नै सेनाले गरेको परीक्षण हो भन्ने लागेको थियो तर पछि उत्तर कोरियाले आक्रमणको पुष्टि छ,” बेङ्न्योङ टापुका बासिन्दा किम जिन–सोले स्थानीय प्रसारक वाईटीएनसँग बताए ।
प्योङयाङले सन् २०१० को नोभेम्बरमा योनप्योङ टापुमा १७० वटा तोपको गोला प्रहार गरेको थियो । आक्रमणमा सन् १९५०–५३ को कोरियाली युद्धपछि उत्तर कोरियाले पहिलो पटक दुई सर्वसाधारणसहित चार जनाको ज्यान लिएको छ ।
किमले धेरै उन्नत आईसीबीएमको परीक्षण गर्दै देशको संविधानलाई आणविक शक्तिको दर्जा दिएपछि दुई कोरियाबीचको सम्बन्ध दशकौँ यताकै सबैभन्दा तल्लो बिन्दुमा पुगेको छ ।
प्योङयाङको यस वर्षको अन्त्यमा भएको महत्वपूर्ण नीतिगत बैठकमा किमले दक्षिण कोरियामाथि आणविक आक्रमण हुनसक्ने चेतावनी दिँदै सशस्त्र द्वन्द्वअघि नै देशको सैन्य शस्त्रागार निर्माण गर्न आह्वान गरेका थिए ।
उनले संयुक्त राज्य अमेरिकाले ‘विभिन्न प्रकारका सैन्य खतरा’ खडा गरेको आरोप लगाएको र आफ्नो सशस्त्र सेनालाई ‘बृहत् युद्ध प्रतिक्रिया क्षमता’ कायम राख्न आदेश दिएका थिए ।
आदेशको पुष्टि गर्दै उत्तर कोरियाको आधिकारिक समाचार संस्था केसीएनएले भनेको थियो, “उत्तर कोरियामा आक्रमण गर्ने शत्रुहरूको लापरबाहीपूर्ण चालका कारण कोरियाली प्रायद्वीपमा कुनै पनि बेला युद्ध भड्किन सक्छ भन्ने निष्कर्ष बैठकले निकालेको छ ।”
प्योङयाङलाई रोक्नका लागि वासिङ्टनले गत वर्षको अन्त्यतिर दक्षिण कोरियाको बन्दरगाह शहर बुसानमा आणविक शक्तिसम्पन्न पनडुब्बी तैनाथ गरेको थियो र सियोल र टोकियोसँगको अभ्यासमा आफ्ना लामो दूरीका बमवर्षक विमान उडाएको थियो ।
उत्तर कोरियाले कोरियाली प्रायद्वीपमा संयुक्त अभ्यासमा वासिङ्टनका बी–५२ बमवर्षक जस्ता रणनीतिक हतियार तैनाथ गर्नुलाई ‘जानाजानी आणविक युद्ध उत्तेजक कदम’ को संज्ञा दिएको छ ।
सम्मेलनको समापनपछि किमले भने, “सेनाले कुनै पनि सम्भावित आणविक सङ्कटको द्रूत तयारी गर्नुपर्छ र आकस्मिक रूपमा आणविक बलसहित सबै भौतिक साधन र शक्तिहरू परिचालन गरेर दक्षिण कोरियाको सम्पूर्ण भूभागलाई दबाउने महान् घटनाको तयारीलाई निरन्तर उत्प्रेरित गर्नुपर्दछ ।”
सन् २०२३ मा, उत्तर कोरियाले युक्रेनका लागि हतियार स्थानान्तरणको बदलामा रूसबाट सहयोग प्राप्त गरेपछि सफलतापूर्वक एक टोही उपग्रह प्रक्षेपण गरेको थियो ।
