काठमाडौं । सवारी दुर्घटना बढेपछि दुर्घटनाको कारण पत्तालगाउन भौतिक पूर्वाधार तथा यातायात मन्त्रालयले पाँच सदस्यीय कार्यदल गठन गरेको छ । आइतबार भौतिक पूर्वाधार तथा यातायात मन्त्री प्रकाश ज्वालाले भौतिक र प्राविधिक पक्षका त्रृटिहरु पत्ता लगाउन कार्यदल गठन गरेका हुन्।
सडक दुर्घटनाका त्रृटि र कमजोरी पत्ता लगाउन मन्त्रालयका पूर्वसचिव धनबहादुर तामाङको अध्यक्षतामा पाँच सदस्यीय कार्यदल गठन गरिएको हो ।संघीय सडक सुपरिवेक्षण कार्यालय सुर्खेतका सीई श्यामबहादुर खड्का, सवारी अनुगमन मापदण्ड तर्जुमा र सवारी चालक व्यवस्थापन अन्तरप्रदेश समन्वय, अनुसन्धान शाखाका निर्देशक, प्रहरी प्रधान कार्यलय ट्राफिक महाशाखाका प्रतिनिधि र भौतिक पूर्वाधार तथा यातायात मन्त्रालयका सिडिई सुरेश श्रेष्ठ सदस्य सचिव रहने गरी कार्यदल गठन गरिएको हो ।
कार्यदललाई विगत एक महिनामा भएका सवारी दुर्घटना, विगतमा भएका कार्यदलका प्रतिवेदन र स्थलगत अध्ययन गर्न, सडक दुर्घटनाका कारण र पक्षको बिश्लेषण गर्न, सडक दुर्घटना न्यूनीकरण गर्न संस्थागत र प्राविधिक पक्षको विश्लेषण गर्न जिम्मेवारी दिइएको छ । शुक्रबार र शनिबारको २४ घण्टाको अवधिमा सवारी दुर्घटनमा परी १९ जनाको मृत्यु भएको छ ।
नेपालगञ्जबाट काठमाडौं आउँदै गरेको यात्रृ बस शुक्रबार राति दुर्घटना हुँदा १२ जनाले ज्यान गुमाएका थिए भने, शनिबार चन्द्रागिरीमा भएको दुर्घटनामा ५ जना र बाग्लुङको बुर्तिबाङबाट ढोरपाटन जाँदै गरेको जीप दुर्घटना हुँदा २ जनाको ज्यान गएको थियो । त्यसपछि मन्त्रालयले सडक दुर्घटना न्यूनीकरणका अल्पकालिन, मध्यकालिन र दिर्घकालीन उपायहरु सुझाउन कार्यदललाई जिम्मेवारी दिइएको छ ।
